ახალციხის მერია აუქციონზე ოთხ ობიექტს გაიტანს

ახალციხის მერია აუქციონის წესით ოთხ არასასოფლო სამეურნეო დანიშნულების მიწის ნაკვეთს აუქციონზე გაიტანს. ოთხივე ფართობის მოცულობა 600–600 კვადრატული მეტრია. თითო კვადრატული მეტრის ღირებულება კი 20 ლარია.

მერიამ საკუთრებაში არსებული ქონების საპრივატიზებო ობიექტების პრივატიზების გეგმა საკრებულოს დასამტკიცებლად 16 თებერვალს, სხდომაზე წარუდგინა.

საკრებულოში უმრავლესობის დეპუტატების ნაწილი ფიქრობს, რომ 20 ლარი კვადრატულ მეტრში ისეთ ადგილზე, როგორიც ახალციხის საავადმყოფოს მიმდებარე ტერიტორიაა, ძვირია.

„იქ არაფერი არ არის. რატომ გადაიხდიან ამდენს?! ცოტასაც დაამატებენ და ქალაქის ცენტრში ბინას შეიძენენ“, – ამბობს დეპუტატი ‘ქართული ოცნებიდან’ ამბარცუმ ბაბიოანი.

„ქალაქის ცენტრშიც და გარე უბანშიც 20 ლარი მიწა არ უნდა ღირდეს“, – ამბობს დეპუტატი ,ქართული ოცნებიდან’ გელა პეტაშვილი.
მას ეთანხმება საკრებულოს თავმჯდომარის მოადგილე თამარ გოგოლაძე: „ვფიქრობ, რომ ძვირია, საინტერესოა თანხის ოდენობა რა კრიტერიუმებით განსაზღვრეს“.

როგორც ახალციხის საკრებულოს საფინანსო–საბიუჯეტო, ეკონომიკისა და ქონების მართვის საკითხთა კომისიის თავმჯდომარე შოთა ნასყიდაშვილი აცხადებს, თანხის ოდენობა გასულ წელს აუდიტმა განსაზღვრა: „ამისთვის მერიამ ტენდერი გამოაცხადა და აუდიტი ისე შეარჩია“.

მიუხედავად აზრთა სხვადასხვაობისა, ახალციხის საკრებულომ მერიის გეგმა ხმათა უმრავლესობით დაამტკიცა.

„ალბათ მერია ფიქრობს, რომ რაც მეტად გაყიდის მიწას, მით უკეთესია. ჩვენ მხარი დავუჭიროთ, რომ გაყიდოს ეს მიწები“, – მიმართა სხდომაზე დეპუტატებს საკრებულოს თავმჯდომარემ დავით ლომიძემ.

[sknews.ge]