ახალციხის მერიაში ‘ქამრების შემოჭერა’ დაიწყეს

ქალაქ ახალციხის მერია ადმინისტრაციული ხარჯების შემცირებას გეგმავს. ამის შესახებ მერიაში საფინანსო – საბიუჯეტო კომისიის სხდომა დღეს, 15 აპრილს გაიმართა.

საფინანსო – საბიუჯეტო კომისიის თავმჯდომარის შოთა ნასყიდაშვილის თქმით, „ქამრების შემოჭერის“ მიზნით, მერია საწვავის, სამეურნეო ნივთების, კომუნალურებისა და წარმომადგენლობითი ხარჯების შემცირებას გეგმავს.

„მთავრობის სხდომაზე იყო საუბარი „ქამრების შემოჭერაზე“ ჩვენც გადავხედეთ ბიუჯეტს და არის იმის საშუალება, რომ თანხები დავზოგოთ“, – ამბობს შოთა ნასყიდაშვილი.

მერიამ საწვავის ხარჯი 8.000 ლარით შეამცირა. საწვავზე 55.400 ლარის ნაცვლად 47 400 ლარი დაიხარჯება. სამეურნეო ნივთების ხარჯები კი 600 ლარით შემცირდა და 4.500 ლარის ნაცვლად 3.900 ლარი დაიხარჯება.

5.000 ლარით შემცირდა ინტერნეტის ხარჯი, წარმომადგენლობითი ხარჯები კი 8.000 ლარით შემცირდა და 103.810 ლარის ნაცვლად 95 810 ლარი დაიხარჯება.

როგორც შოთა ნასყიდაშვილი ამბობს, საერთო ჯამში, მერიამ ადმინისტრაციული ხარჯების შემცირებით 33.000 ლარი დაზოგა.
საფინანსო – საბიუჯეტო კომისიის 6 წევრიდან სხდომას 5 ესწრებოდა და ხუთივემ აღნიშნულ საკითხს მხარი ერთხმად დაუჭირა.

მიუხედავად ამისა, ოპოზიცია ფიქრობს, რომ მერიის ეს ნაბიჯი არასერიოზულია. ქალაქ ახალციხის საკრებულოს ფრაქცია „ერთიანი ნაციონალური მოძრაობის“ თავმჯდომარე და საფინანსო – საბიუჯეტო კომისიის წევრი მალხაზ გიქოშვილი ამბობს, რომ მერიას არასწორი საკადრო პოლიტიკა აქვს: „მერიის მიერ „ქამრების შემოჭერის“ პრინციპი არასერიოზულად მიმაჩნია, აქ საუბარია მხოლოდ 33.000 ლარზე. თანხების დაზოგვა სხვაგვარადაც შეიძლება. მერს ჰყავს ორი მოადგილე და 4 თანაშემწე, მათ ხელფასი კი 1 500 ლარზე ნაკლები არ არის. მათი ანაზღაურება, რომ გაამრავლო 12 თვეზე... წარმოიდგინეთ რამხელა ეკონომია გაკეთდება“.

საფინანსო – საბიუჯეტი კომისია აღნიშნულ საკითხებს ჯერ ბიუროს წარუდგენს, რის შემდეგაც საკითხები დასამტკიცებლად უკვე საკრებულოს სხდომაზე გავა.

[მანანა სარაშვილი, ახალციხე]