ახალციხის საკრებულოს ანგარიში ხალხს

დღეს, 8 თებერვალს, ქალაქ ახალციხის საკრებულოს ინიციატივით, ადგილობრივი თვითმმართველობის წევრები არასამთავრობო სექტორს, მოსახლეობასა და ახალშექმნილი საზოგადოებრივი დარბაზის წარმომადგენლებს შეხვდნენ.

საკრებულოს თავმჯდომარემ დავით ლომიძემ, შეკრებილებს, გასულ წელს თვითმმართველობის მიერ შესრულებული სამუშაოს ანგარიში ჩააბარა.

მისი თქმით, 2016 წლის ბიუჯეტი 7.774.000 ლარიდან 12.750.000 ლარამდე გაიზარდა. ინფრასტრუქტურული პროექტებისთვის 5.121.183 ლარი დაიხარჯა, აქედან ადგილობრივი ბიუჯეტიდან 3 272 925 ლარი, რაც 2015 წელთან შედარებით ნახევარი მილიონით მეტია .
„2016 წელს 6 262 მეტრი შიდა საავტომობილო გზა მოასფალტდა. 12 364 მეტრიასფალტი დაიგო კორპუსების ეზოებში“, – განაცხადა დავით ლომიძემ.

საკრებულოს თავმჯდომარის განმარტებით, 2016 წელს კერძო ინვესტიციების სახით ახალციხეში 14 475 000 ლაზე მეტი ჩაიდო. აღნიშნული თანხით ქალაქში შენდება სასტუმროები, სრული რეაბილიტაცია ჩაუტარდა ახალციხის რეფერალურ სააავადმყოფოს.

ახალციხის მერიაში სოციალური პროგრამებით მოსარგებლე ბენეფციარების რაოდენობა კი 14%–ით გაიზარდა.

„ჯანდაცვის პროგრამას დაემატა ახალი სერვისები, რომელიც 2015 წელს არ იყო. როგორიცაა თვალის დაავადებათა მკურნალობა, c ჰეპატიტის,ფარისებრი ჯირკვლის, და მკერდის კიბოს გამოკვლევები და ა.შ. ასევე გაიზარდა სხვადასხვა გამოკვლევების ჩასატარებლად თანხები“, – განაცხადა შეხვედრაზე დავით ლომიძემ.

მისივე თქმით, ქალაქ ახალციხის ცნობადობის გაზრდის მიზნით და ტურისტების მოსაზიდად, 2016 წელს დაიბეჭდა ტურისტული ბუკლეტები, ახალციხის რუკა, საიმიჯო ბროშურები და ბანერები. ასევე კულტურის სამსახურმა მონაწილეობა მიიღო საერთაშორისო ტურისტულ გამოფენაში, რომელიც ქალაქ სტამბოლში გაიმართა. აღნიშნულმა სამსახურმა ასევე გადაიღო ტურისტული ვიდეორგოლი, სადაც ასახულია ქალაქის ტურისტული პოტენციალი, მესხური სამზარეულო და ისტორიულ–კულტურული ძეგლები.

საკრებულოს თავმჯდომარის განცხადებით, 2016 წელს ახალციხეს 137 633 ვიზიტორი ეწვია, ეს ციფრი, 2015 წელთან შედარებით, 18%–ით გაიზარდა.

„ქალაქში 24 სასტუმროა. სეზონის დროს ყოველდღიურად 600–დან 800–მდე ტურისტი რჩებოდა“, – განაცხადა დავით ლომიძემ.
საკრებულოს თავმდჯომარე ყველაზე წარმატებულ პროექტად საკრებულოსთან საზოგადოებრივ დარბაზს ასახელებს, რომელიც ახალი შექმნილია და 50 პირია გაწევრიანებული.

დაახლოებით 20 წუთიანი გამოსვლის დასრულებისას, დავით ლომიძემ განაცხადა, რომ ქალაქში კიდევ ბევრი პრობლემაა მოსაგვარებელი: „აღმასრულებელ ხელისუფლებასთან ერთად და მოქალაქეების აქტიური ჩართულობით ბევრი პრობლემის მოგვარება იქნება შესაძლებელი“.
შეგახსენებთ, რომ ქალაქ ახალციხის საკრებულოს გაფართოებული სხდომა სამცხე–ჯავახეთის სახელმწიფო უნივერსიტეტის მეორე კორპუსში გაიმართა. ინიციატივა საკრებულოს თავმჯდომარეს დავით ლომიძეს ეკუთვნის.

[თინათინ ზაზაძე, ახალციხე]