ნომინაციაში „რუსთველოლოგია“გამარჯვებული გამოვლინდა

ლიტერატურული კონკურსი, 2016 წლის აპრილის თვეში დაიწყო და შოთა რუსთაველის 850–ე საიუბილეო წელს მიეძღვნა. მასში მონაწილეობა უმაღლესი სასწავლებლების იმ მეცნიერებმა მიიღეს, რომლებიც რუსთველოლოგიაში მუშაობენ. ჟიურიმ საუკეთესო ნაშრომად პროფესორ ნესტან სულავას მონოგრაფია, სახელწოდებით „ვეფხისტყაოსნის პერსონაჟები“ საუკეთესოდ დაასახელა. გამარჯვებულმა პრიზი 3 000 ლარი მიიღო.

,,ვფიქრობ, რომ დიდი პატივი მხვდა წილად, ძალიან გახარებული ვარ. ეს მხოლოდ ჩემი კი არა, მთელი რუსთველოლოგიური მეცნიერების გამარჯვებაა“ – განმარტა ნესტან სულავამ.

ლიტერატურული კონკურსი სამცხე–ჯავახეთის სამხარეო ადმინისტრაციის, რეგიონული გაზეთის „ლიტერატურული მესხეთისა“ და მხარის მუნიციპალიტეტების ერთობლივი ინიციატივით და ფინანსური მხარდაჭერით ჩატარდა.

ღონისძიებაზე, სკოლის მოსწავლეებმა, შოთა რუსთაველის ,,ვეფხისტყაოსნიდან“ საზეპიროები წაიკითხეს.

დაჯილდოებას სამხარეო ადმინისტრაციისა და მუნიციპალიტეტების ხელმძღვანელები, ასევე ახალციხის სახელმწიფო უნივერსიტეტის მეცნიერ– თანამშრომლები, სკოლების დირექტირები და ფილოლოგები დაესწრნენ.





[მარიამ ბარძიმაძე, ახალციხე]