მიწისძვრით დაზიანებული ბინებისთვის ახალციხის მერია 20 000 ლარს ითხოვს

ახალციხის მერიის ინფორმაციით 20 იანვარს ახალციხეში მომხდარი მიწსიძვრის გამო სამი კორპუსი და ორი კერძო ბინა დაიბზარა. როგორც ახალციხის მერი ვლადიმერ ზედგინიძე ამბობს, აღნიშნული კორპუსები 30–40–იან წლებშია აშენებული: „მცირედი დაზიანებები მიიღო შენობებმა“.

მიწისძვრით დაზიანებულ ბინებს შორის ერთ–ერთი ახალციხეში გამრეკელის N4–ში მდებარე ორსართულიანი შენობაა. აქ მცხოვრები სამი ოჯახი თვითმმართველობას დახმარებას წლებია სთხოვს, რადგან კორპუსი მიწისძვრამდეც ავარიული იყო. შენობა, გასული საუკუნის 40–იან წლებშია აშენებული. მას დაზიანებული აქვს კელდები, კიბე და სახურავი. როგორც აქ მცხოვრებლები ამბობენ, სახურავიდან წყალი ჩამოდის.

რუზანნა მეიტარჯიანი სამ შვილთან ერთად 20 წელია, რაც ამ ბინაში ცხოვრობს, ოჯახი სოციალურად დაუცველია და მათი შემოსავლის ერთადერთი წყარო სოციალური დახმარება 250 ლარია.

„ყოფილი პოლიკლინიკის შენობაა, ძალიან ძველია. მეშინია, რომ არ ჩამოინგრეს, შიშის ქვეშ ვცხოვრობთ. არ გვაქვს საშუალება, რომ შევაკეთოთ. ჩვენი პატრონი არავინ არის. რა გაუჭირდა ხელისუფლებას, რომ შენობა გაამაგროს და მშვიდად ვიცხოვროთ“, – ამბობს რუზანნა მეიტარჯიანი.

ავარიულ ბინაში დაახლოებით 10 ადამიანი ცხოვრობს, ნაწილს არც სოციალური დახმარება აქვს და არც სამსახური. როგორც ადგილობრივები ყვებიან ბინები მათი საკუთრებაა, წლების წინ თვითნებურად შესახლებულებს, ხელისუფლებამ მფლობელობაში გადასცა.

„უამრავი წერილი დავწერე მერიის სახელზე, დახმარება გიორგი კოპაძესაც (ქალაქის ყოფილი მერი ს.კ) ვთხოვე და ვლადიმერ ზედგინიძესაც, მაგრამ მეუბნებიან თანადაფინანსების შემთხვევაში დაგეხმარებითო. ფული რომ მქონდეს მაგათი დახმარება რათ მინდა. მითხარით ხალხო 250 ლარით როგორ ვიცხოვრო და სახლიც გავაკეთო. ვითხოვთ გარედან გაგვიმაგრონ, შიგნიდან ჩვენ როგორმე შევძლებთ გაკეთებას“, – ამბობს რუზანნა მეიტარჯიანი.

გამრეკელის N4–ში მცხოვრებთა მდგომარეობა განსაკუთრებით 20 იანვარს მომხდარმა მიძისძვრამ დაამძიმა, როგორც მეიტარჯიანები ამბობენ, ისედაც ავარიულ სახლს უკანა კედელი კიდევ უფრო დაუზიანა და ბზარები დაემატა. შეუძლებელი გახდა სარგებლობა კიბეებითაც.
„მოვიდნენ მერიიდან, სახლს გარედან შემოუარეს და წავიდნენ“, – ამბობენ ადგილობრივები.

ახალციხის მერიაში აცხადებენ, რომ 20 იანვრს მომხდარი მიწისძვრის შემდეგ სპეციალურმა კომისიამ დაზიანებული სახლები მეორე დღესვე შეისწავლა. მერის ვლადიმერ ზედგინიძის განმარტებით მიღებული ზარალი დაახლოებით 20 000 ლარია.

თვითმმართველობამ აღნიშნული თანხა რეგიონული განვითარებისა და ინფრასტრუქტურის სამინისტროს სთხოვა.

„ კომისიის მიერ შესწავლილი იქნა ეს საკითხი. წინასწარ ვერაფერს გეტყვით, იმედი გვაქვს რომ დახმარებას შევძლებთ“, – განაცხადა ვლადიმერ ზედგინიძემ.

20 იანვარს, ახალციხეში 4,3 მაგნიტუდის სიმძლავრის მიწისძვრა მოხდა. ილიაუნის სეისმური მონიტორინგის ცენტრის ინფორმაციით, მიწისძვრის ეპიცენტრი ქალაქ ახალციხესთან 10 კილომეტრში, სოფელ ანში იყო.






[თინათინ ზაზაძე, ახალციხე]