„ევროპული საქართველოს“ ლიდერები სამცხე–ჯავახეთში მხარდამჭერებს 4 თებერვალს შეხვდებიან

„ნაციონალური მოძრაობიდან“ გასულმა გუნდმა პოლიტიკური პარტია "მოძრაობა თავისუფლებისთვის - ევროპული საქართველო" დააფუძნა. პრეზენტაცია დღეს, 30 იანვარს გაიმართა და მას მხარდამჭერები სამცხე–ჯავახეთიდანაც ესწრებოდნენ.

როგორც პრეზენტაციიდან გამოსვლის შემდეგ ახალციხესა და ადიგენში ახალი პარტიის მხარდამჭერებმა განაცხადეს, რეგიონში ლიდერებთან შეხვედრა 4 თებერვალს გაიმართება.

"ვისაუბრებთ როგორც ოფისებისა და ინფრასტრუქტურის, ასევე რაიონული ორგანიზაციების დაკომპექტების საკითხებზე", – ამბობს "მოძრაობა თავისუფლებისთვის - ევროპული საქართველოს" წარმომადგენელი ახალციხეში ვაჟა ჩიტაშვილი.

როგორც ახალციხეში ახალი პარტიის წარმომადგენელი გელა დემეტრაძე აცხადებს, პარტია ფუნქციონირებს იმ ოფისში გააგრძელბს, რომელშიც ამ დრომდე „ნაციონალური მოძრაობა“ მუშაობდა. ახალციხისგან განსხვავებით, სხვა საოფისე ფართის მოძებნა დასჭირდება ადიგენის ორგანიზაციას.

„ალბათ იქ ვეღარ დავრჩებით, რიგი საკითხები 4 თებერვალს გაირკვევა“, – განაცხადა
"მოძრაობა თავისუფლებისთვის - ევროპული საქართველოს" წარმომადგენელმა ადიგენში სიმონ პარუნაშვილმა.

პოლიტიკური პარტიის "მოძრაობა თავისუფლებისთვის - ევროპული საქართველო" დაფუძნების შემდეგ პარტიის გენერალურ მდივნად გიგი უგულავა აირჩიეს. სხვა თანამდებობებთან დაკავშირებული გადაწყვეტილებები კი, ყრილობაზე გახდება ცნობილი.

[თამუნა უჩიძე, ახალციხე]