ვინ დარჩა და ვინ წავიდა „ნაციონალებიდან’ სამცხე–ჯავახეთში

„ყველას აზრი პატივსაცემია. ადამიანებს ქონდათ პრეტენზიები, შესაბამისად, გააკეთეს თავის არჩევანი. ჩვენ ორგანიზაციის 99% ვრჩებით „ნაციონალურ მოძრაობაში“, – აცხადებს „ნაციონალური მოძრაობის“ ბორჯომის რაიონული ორგანიზაციის ხელმძღვანელი ვახტანგ ქვათაძე.
რაც შეეხება რეგიონის დანარჩენ მუნიციპალიტეტებს, „ნაციონალური მოძრაობა“ ყველა რაიონულმა ორგანიზაციამ დატოვა.

საქართველოს მე-8 მოწვევის პარლამენტარის (2012-2016 წ.წ), „ნაციონალური მოძრაობის“ უკვე ყოფილის წევრის ზურაბ ჩილინგარაშვილის თქმით , უახლოეს ათ დღეში ახალი პოლიტიკური ძალის წარმომადგენლებთან ერთად, რეგიონებში ჩასვლასა და რაიონული ორგანიზაციების შექმნას გეგმავენ: „ჩვენ შექმნით ადგილობრივ ორგანიზაციებს ქალაქებში, შემდეგ სოფლებში გავაგრძელებთ მუშაობას“.

მისივე თქმით, ვის აირჩევენ სამცხე–ჯავახეთის მუნიციპალიტეტებში რაიონული ორგანიზაციების ხელმძღვანელებად, ჯერ გადაწყვეტილი არ არის: „მოკლე დროში გადაწყდა ყველაფერი. ასე მალე ვერ გავთვლიდით, მოგვიწევს ცოტა ფიქრიც და არჩევნის გაკეთებაც“.

ე.წ. უგულავა-ბოკერიას ფრთის წარმომადგენლები აცხადებენ, რომ ახალი პარტიას დახლოებით ერთ თვეში დააფუძნებენ. ხელმძღვანელიც დავით ბაქრაძე იქნება.

შეგახსენებთ, რომ ნაციონალური მოძრაობის ნაწილმა პარტია გუშინ, 12 იანვარს დატოვა. პარტია დატოვეს 38 საქალაქო და რაიონული ორგანიზაციის თავმჯდომარეებმა და წევრებმა, 21 დეპუტატმა, ასევე პოლიტსაბჭოს წევრების ნაწილმა.


დაპირისპირება “ერთიან ნაციონალურ მოძრაობაში” საპარლამენტო არჩევნების შემდეგ დაიწყო. პარტიის წევრთა ნაწილი, მათ შორის, გიგი უგულავა, დავით ბაქრაძე, გიგა ბოკერია, ზურაბ ჭიაბერაშვილი და პარტიის დეპუტაცია მოქმედი პოლიტსაბჭოს სხვა წევრებთან ერთად მიხეილ სააკაშვილსა და პოლიტსაბჭოს სხვა წევრებს, ლევან ვარშალომიძეს, ზაზა ბიბილაშვილს, ჩიორა თაქთაქიშვილს, ნუგზარ წიკლაურს, აკო მინაშვილსა და სხვა ლიდერებს დაუპირისპირდა. იმ საკითხებს შორის, რომელზეც პარტიის წევრები ვერ თანხმდებოდნენ, პარლამენტის ბოიკოტი და მეორე ტურებში მონაწილეობის მიღება იყო. მიხეილ სააკაშვილი ამბობდა, რომ მეორე ტურებში მონაწილოების აზრს ვერ ხედავდა, საპირისპირო გადაწყვეტილება მიიღო პარტიის პოლიტსაბჭომ. პარლამენტში შესვლის იდეას პოლიტსაბჭოს მხოლოდ 9 წევრი შეეწინააღმდეგა.
კიდევ ერთი საკითხი, რამაც პარტიაში დაპირისპირება გაამწვავა, მიხეილ სააკაშვილის როლი იყო“ერთიან ნაციონალურ მოძრაობაში”.

[თინათინ ზაზაძე, ახალციხე]