„ერთიანი ნაციონალური მოძრაობის“ ბორჯომის რაიონული ორგანიზაციიდან ხვალ, 20 იანვარს პარტიის ყრილობაზე 35 დელეგატი გაემგზავრება. თუმცა, ღონისძიებას ყველა მათგანი სტუმრის სტატუსით დაესწრება. ამიტომ არჩევნებში მონაწილეობას და თავიანთი პოზიციის იურიდიულად დაფიქსირებას ვერ შეძლებენ.
პარტიაში დელეგატების შერჩევა რაიონული ორგანიზაციის ხელმძღვანელისა და მაჟორიტარი დეპუტატობის ყოფილი კანდიდატების მიერ ხდება. თუმცა, ბორჯომში დეპუტატობის კანდიდატი ტარიელ ლონდარიძე პარტიიდან გამოვიდა, შესაბამისად, მასთან ერთად ბორჯომის რაიონული ორგანიზაციის ხელმძღვანელი დელეგატებს ვერ შეარჩევდა.
შეკითხვაზე, არის თუ არა ეს მიზეზი, რის გამოც დელეგატები სტუმრის სტატუსით მიდიან პარტიულ ყრილობაზე, ბორჯომის რაიონული ორგანიზაციის ხელმძღვანელი ვახტანგ ქვათაძე გვპასუხობს: „არა, კონფერენცია უნდა ჩაგვეტარებინა, მაგრამ პარტიაში არსებული არეულობის გამო ვეღარ მოხარხდა. ამიტომ დელეგატების განსაზღვრა ბორჯომის პოლიტსაბჭოს ცხრაკაციანი წევრების მიერ მოხდა“.
მისივე თქმით, სწორედ ამის გამო, ყრილობაზე მისი დელეგატები მხოლოდ ხელისაწევით გამოხატავენ საკუთარ პოზიციას, ოფიციალურად კი მის დადასტურებას ვერ შეძლებენ. ქვათაძე ამბობს, რომ ბორჯომიდან პარტიას არცერთი წევრი არ დაუკარგავს და აქ ყველა ერთ აზრზეა: „გადაწყვეტილება რასაც ყველა ვეთანხმებით ბორჯომში, არის ის, რომ პარტიის თავმჯდომარის პოზიცია უნდა იყოს თავისუფალი, ვიდრე სააკაშვილი ვერ შეძლებს საქართველოში დაბრუნებას“.
გარდა თავმჯდომარის საკითხისა, პარტია ყრილობაზე პოლიტსაბჭოსაც აირჩევს.
„პოლიტსაბჭოში ავტომატურად არიან რაიონული ორგანიზაციის თავმჯდომარეები, დანარჩენი წევრები კი ხმათა უმრავლესობით აირჩევიან. აქამდე საბჭოში 72 წევრი იყო, მერე 65 დარჩა და ახლა რამდენი კაცით განისაზღვრება არ ვიცი“, – ამბობს ქვათაძე.
მას მიაჩნია, რომ იმ დროშის ქვეშ უნდა იბრძოლოს არჩევნების მოგებისათვის, რომელი დროშის ქვეშაც არჩევნები წააგო. გარდა ამისა, მიიჩნევს, რომ პარტიის თავმჯდომარე ისეთი საერთაშორისო დონის პოლიტიკოსი უნდა იყოს, როგორიც სააკაშვილია. მის შემცვლელს ჯერ–ჯერობით ვერ ხედავს.
რაც შეეხება ოპონენტების მოსაზრებას იმის შესახებ, რომ სააკაშვილი სხვა ქვეყანაში ცხოვრობს, სადაც მას თავისი პოლიტიკური პარტია უკვე აქვს, ამის გამო კი ქართულ რეალობას მოწყვეტილია, ქვათაძე ამბობს: „როდესაც ჩავდიოდით ოდესაში ან კიევში და სააკაშვილს ვესაუბრებოდით, მას ყოველთვის სრულყოფილი ინფორმაცია ჰქონდა საქართველოში მიმდინარე მოვლენების შესახებ. ასევე, მის მიერ შემოთავაზებული აქ არსებული პრობლემების მოგვარების გზები ბევრად უფრო მართებული იყო, ვიდრე აქ გვთავაზობდნენ ამ საკთხების გადაწყვეტას სხვები. საქართველო ახლა უკიდურეს გაჭირვებაშია, ამიტომ ვფიქრობ, რომ ხისტად წინსვლა და რადიკალური ცვლილებების განხორციელებაა საჭირო“.
შეგახსენებთ, რომ ერთიანი ნაციონალური მოძრაობის რიგით მეშვიდე ყრილობა 20 იანვარს, 14:00 საათზე სპორტის სასახლეში გაიმართება. მასზე უკვე რეგისტრირებულია 7136 დელეგატი. ყრილობის ძირითადი ნაწილი პოლიტიკური ლიდერების გამოსვლას დაეთმობა, არჩეული იქნება პოლიტსაბჭოს ახალი შემადგენლობა, პოლიტსაბჭოს ახალი თავმჯდომარე. რაც შეეხება პარტიის თავმჯდომარის არჩევის საკითხს, ამასთან დაკავშირებით გადაწყვეტილების მიღებას არ გეგმავენ, ვიდრე პოლიტიკური რეპრესიები არ დასრულდება.
[თამუნა უჩიძე, ბორჯომი]