ახალციხის გამგეობა ათწლიან სესხს ევროს ნაცვლად, ლარში აიღებს

ახალციხის თემმა, ათ წლიანი სესხის აღებისათვის განსაზღვრული თანხა 161 333 ევრო, ეროვნულ ვალუტაში გადაიტანა. ცვლილება მთავრობის განკარგულებამ გამოიწვია, რომელის მიხედვითაც, 2017 წლიდან ყველანაირი სესხი ეროვნულ ვალუტაში გაიცემა.

ახალციხის გამგეობას აღნიშნული სესხი ახალი კომპაქტორიანი ნაგავმზიდისა და 200 კონტეინერის შესაძენად სჭირდება. სესხის აღების თაობაზე თვითმმართველობამ გადაწყვეტილება 2016 წლის 19 დეკემბრის საკრებულოს სხდომაზე მიიღო.

თავდაპირველად, ევროპის რეკონსტრუქციისა და განვითარების ბანკიდან ასაღები სესხი 161 333 ევროს შეადგენდა, თუმცა საკრებულოში განმარტავენ, რომ შესაბამისი ოპერაციების შესრულება მუნიციპალიტეტმა 2016 წელში ვერ მოასწრო, ამიტომ, თანხა ევროს ექვივალენტის ნაცვლად ლარში განისაზღვრა.

,,თანხა შეადგენს 483 021 ლარს. აქედან 87 000 არის გამგეობის გადასახდელი, დანარჩენი თანხა 10 წელზეა გათვლილი. რეფინანსირების განაკვეთი 0.5 %–ია. 2016 წელს ხელშეკრულების გაფორმება მოხდა, მაგრამ ოპერაციების შესრულება ვერ მოხერხდა, ფულადი გადარიცხვები ვერ მოესწრო“,– განმარტავს საკრებულოს საფინანსო–საბიუჯეტო კომისიის თავმჯდომარე თეიმურაზ ბარძიმაძე.

ათ წლიანი სესხის დაფარვა ახალციხის გამგეობამ 2019 წლიდან უნდა დაიწყოს და ათ წელიწადში გადაიხადოს. თვითმმართველობას თანხის შეტანა წელიწადში ორჯერ, 28 ოქტომბერსა და 28 აპრილს მოუწევს.

[თაკო ფეიქრიშვილი, ახალციხე]