ახალციხის თემი დასუფთავებისათვის გრანტსა და ათ წლიან სესხს იღებს

29 588 ევროს – გრანტის, ხოლო 161 333 ევროს სესხის სახით ახალციხის მუნიციპალიტეტი ნაგავმზიდისა და 200 კონტეინერის შესაძენად გამოიყენებს. გადაწყვეტილება დღეს, 19 დეკემბერს, თემის საკრებულოს დეპუტატებმა ერთხმად მოიწონეს.

ადგილობრივმა თვითმმართველობამ ევროპის რეკონსტრუქციისა და განვითარების ბანკისგან ევროს ექვივალენტში აიღებული სესხის დაფარვა 2019 წლიდან უნდა დაიწყოს და ათი წლის განმავლობაში გადაიხადოს. გამგეობაში აცხადებენ, რომ სესხს კარგი საშეღავათო პირობები აქვს, მისი გადახდა წელიწადში ორჯერ მოხდება 28 ოქტომბერსა და 28 აპრილს. ვალის ანაზღაურება ევროს იმ კურსით მოხდება, რაც იმ დროისათვის დაფიქსირდება.

"ასეთ კარგ შემოთავაზებაზე უარს ვერ ვიტყოდით. მუნიციპალიტეტისათვისაც აუცილებელია რომ მყარი ნარჩენების კონტეინერები და ნაგავმზიდი შევიძინოთ, რადგან ყველა სოფელს მაქსიმალურად მოვემსახუროთ“– განმარტავს ეკონომიკური განვითარებისა და ქონების მართვის სამსახურის უფროსი ნოდარ ტალახაძე.

მისივე თქმით, ამ დროისათვის, თემს დასუფთავებისათვის არასაკმარისი ტექნიკა ჰყავს.

სოფლებში მყარ ნარჩენებს მხოლოდ ერთი ნაგავმზიდი და ორი მსუბუქი მანქანა აგროვებს. შესაბამისად, ყველა სოფლის სრულყოფილად მომსახურება ვერ ხერხდება.

,,ეს მანქანა იქნება ათ ტონიანი, თოვლისა და ყინულის პირობებშიც რომ მივიდეს ყველგან. 200 ურნას კი განვათავსებთ ისე, რომ ყველა სოფელი მოვიცვათ და ნაგვის კარდაკარ შეგროვება აღარ მოხდეს“– ამბობს ახალციხის გამგებელი ზაზა მელიქიძე.

[თაკო ფეიქრიშვილი, ახალციხე]