ახალციხის თემის ახალი ნაგავმზიდები ექსპლუატაციაში ორ დღეში შევა

ახალციხის მუნიციპალიტეტის გამგეობამ ორი ახალი ნაგავმზიდი შპს „ვალეს კომუნალურ გაერთიანებას“ გადასცა. ამის შესახებ, დღეს 10 მარტს გამართულ საკრებულოს სხდომაზე ახალციხის მუნიციპალიტეტის გამგებელმა ზაზა მელიქიძემ განაცხადა.

„ვალეს კომუნალური გაერთიანება“ თემის მასშტაბით ყველა სოფელს ემსახურება. ამ დრომდე, გამგებლის განცხადებით, დოკუმენტები იყო მოსაწესრიგებელი და დასუფთავების სამსახურისთვის მათი გადაცემა იმიტომ ვერ ხერხდებოდა.

ევროპის რეკონსტრუქციისა და განვითარების ბანკიდან ახალციხის თემმა ათწლიანი სესხი 483 021 ლარი აიღო. ადგილობრივი თვითმმართველობა აღნიშნულ თანხაში ორ განავმზიდთან ერთად 200 ცალ ნაგვის ურნასაც მიიღებს.

ათ წლიანი სესხის დაფარვა ახალციხის გამგეობამ 2019 წლიდან უნდა დაიწყოს. თვითმმართველობას თანხის შეტანა წელიწადში ორჯერ, 28 ოქტომბერსა და 28 აპრილს მოუწევს.

შეგახსენებთ, რომ მსგავსი პირობით ნაგავმზიდები და ნაგვის ურნები სამცხე–ჯავახეთის ყველა მუნიციპალიტეტმა იანვარსა და თებერვალში მიიღო. თუმცა იმის გამო, რომ თივთმმართველობებს მანქანებისთვის ტექნიკური პასპორტები აქვთ ასაღები, ამ დრომდე ექსპლუატაციაში არცერთი მათგანი არ შესულა.

[თინათინ ზაზაძე, ახალციხე]