გიგი უგულავამ საპატიმრო დატოვა

პატიმრობიდან გათავისუფლებულმა გიგი უგულავამ ჟურნალისტებთან პირველი კომენტარი გააკეთა. იგი მთავრობას პოლიტიკური ამნისტიისკენ მოუწოდებს.

"სამწუხაროდ, დღეს საქართველოში გვყავს პოლიტპატიმრები და ერთობლივი ამოცანაა ეს პროცესი დასრულდეს. თუ ჩემი გათავისუფლება ამ პროცესის დასაწყისია, ძალიან კარგი, მაგრამ ამ მიმართულებით სამუშაო არის ძალიან ბევრი. მინდა ყველამ გააცნობიეროს, სანამ ჩვენს ქვეყანას ეყოლება პოილიტპატიმრები, პოლიტიკა იქნება უკიდურესად რადიკალური", – განაცხადა დედაქალაქის ყოფილმა მერმა.

მისივე თქმით, იგი უახლოეს მომავალში ”ნაციონალურ მოძრაობაში” მიმდინარე დაპირისპირების საკითხზე შეხვედრას საქრთველოს ყოფილ პრეზიდენტთან მიხეილ სააკაშვილთან გეგმავს.

შეგახსენებთ, რომ დღეს, 6 იანვარს სააპელაციო სასამართლომ „თბილსერვის ჯგუფის“ საქმეზე უგულავას პატიმრობის ვადად 1 წელი, 3 თვე და 22 დღე განუსაზღვრა, პატიმრობის ვადის ათვლა კი 2015 წლის 18 სექტემბრიდან მოხდა. ყოფილი თბილისი მერი ორშაბათს, 9 იანვარს უნდა გათავისუფლებულიყო. იმის გამო, რომ „პატიმრობის კოდექსის“ მიხედვით, პირი პატიმრობის ვადის ამოწურვის წინა დღეს უნდა გათავისუფლდეს, ხოლო თუკი ეს დღე უქმე დღეს ემთხვევა, კიდევ უფრო ადრე - სამუშაო დღეს, უგულავამ საპატიმრო დაწესებულება დღეს, 6 იანვარს დატოვა.

[sknews.ge]