გიგი უგულავას პატიმრობიდან გაათავისუფლებენ

სააპელაციო სასამართლომ „თბილსერვის ჯგუფის“ საქმეზე უგულავას პატიმრობის ვადად 1 წელი, 3 თვე და 22 დღე განუსაზღვრა, პატიმრობის ვადის ათვლა კი 2015 წლის 18 სექტემბრიდან მოხდა. ამ ვადის გათვალისწინებით, უგულავა საპატიმროდან 9 იანვარს უნდა გათავისუფლდეს.

ბრალდების თანახმად, გიგი უგულავამ “თბილსერვისში” პარტიული აქტივისტები დაასაქმა და გაფლანგა სახელმწიფოს კუთვნილი თანხები. თბილსერვისის საქმეზე, ამნისტიის გათვალისწინებით, თბილისის ყოფილ მერს 4 წლით და 6 თვით თავისუფლების აღკვეთა ჰქონდა მისჯილი.

"თბილსერვის ჯგუფის საქმეში გიგი უგულავას სააპელაციო სასამართლომ გაფლანგვის ბრალდება მოუხსნა და დაუტოვა სამსახურეობრივი უფლებამოსილების გადამეტება, სასამართლომ მას სასჯელის სახით დაუნიშნა 1 წელი და 9 თვე, საიდანაც 1/4 აკლდება საქართველოს ამნისტიის შესახებ კანონის შესაბამისად, ანუ რჩება 1 წელი, 3 თვე და 22 დღე მოსახდელი, გიგი სასჯელს იხდის 2015 წლის 18 სექტემბრიდან, თუმცა მანამდე ის უკანონო პატიმრობაში იმყოფებოდა 9 თვეზე მეტი ხნის ვადით, ამ რიცხვიდან სასჯელის ვადა ჩვენი დათვლით გადის 9 იანვარს" - აცხადებს გიგი უგულავას ადვოკატი ბექა ბასილაია.

[sknews.ge]