აწყურის ციხესთან გზას ამაგრებენ

გაღმა აწყურში, მტკვრის მარჯვენა სანაპიროზე, სამანქანო გზის პრობლემა დიდი ხანია არსებობს. იმის გამო, რომ წყალი გზის ამ მონაკვეთს მიწას აცლის, მწყობრიდან ხშირად გამოდის და შეკეთებას საჭიროებს. ამ ეტაპზე ნაპირსამაგრი სამუშაოები მიმდინარეობს, რომელსაც ბი-პის კონტრაქტორი ფირმა ”ფერი” ასრულებს.

- ”ამ ეტაპზე მიმდინარეობს დაახლოებით 80-მეტრიანი მონაკვეთის ნაპირსამაგრი სამუშაოები, რაც მდინარის პირზე ქვების ჩალაგებას გულისხმობს”, - ამბობს სუპერვაიზერი ლევან მენთეშაშვილი.

აწყურის ციხის მიმდებარე ტერიტორიაზე ნაპირსამაგრი სამუშაოები სამი დღის წინ დაიწყო. სამუშოები სავარაუდოდ ერთ თვეში უნდა დასრულდეს.

”ხიდი, რომელიც აღნიშნულ გზას ცენტრალურ გზასთან აკავშირებს, მოძველებულია და დიდი ტევადობის ტვირთს ვერ გაუძლებს. ამიტომ გამოვნახეთ ალტერნატიული გზა, საიდანაც აღნიშნული სამუშაოებისთვი საჭირო მასალას შემოიტანენ. ამ ეტაპზე მიმდინარეობს ამ გზის მოხრეშვა და თუ წვიმებმა ხელი არ შეგვიშალა, სამუშაოები ერთ თვეში უნდა დასრულდეს”, - ამბობს აწყურის ტერიტორიული ორგანოს რწმუნებული შუქრი გოგოლაძე.

ლევან მენთეშაშვილის თქმით, აღნიშნული სამუშაოების შესრულების შემდეგ პრობლემა საბოლოოდ ვერ მოგვარდება, თუმცა, გარკვეული პერიოდის განმავლობაში გზას გაამაგრებს.

კონკრეტულად რა თანხა იხარჯება აღნიშნული სამუშაოებისთვის, ვერც მშენებლები და ვერც სოფლის რწმუნებული ვერ აკონკრეტებენ.



[თამარ თოთაძე, ახალციხე]