მაღალი ფასი, დაბალი აქტივობა – წინასაახალწლო ბაზარი [ინფოგრაფიკა]

ხილ-ბოსტნეულით, სურსათითა და ტკბილეულით გადატვირთული დახლები და მოვაჭრეები, რომლებიც მყიდველს უშედეგოდ ელიან - ასე გამოიყურება ახალციხის აგრარული ბაზარი, ახალი წლის დადგომამდე ხუთი დღით ადრე.

2017 წლის შესახვედრად, დიასახლისები პროდუქტის შეძენას ან არ ჩქარობენ, ან კიდევ ლარის კურსის მკვეთრი ცვლილება მათ ჯიბეებზეც აისახა, – ასეთია ბაზარში მომუშავეთა შეფასებებიდა როგორც ჩანს, არც თუ უსაფუძვლო, – ის მყიდველები, ვინც 22 დეკემბერს ბაზარში ჩავწერეთ, ამბობენ, რომ მათი „ჯიბე ბაზრის ფასებს ვერ წვდება“.

„ძალიან ძვირია ყველაფერი, ამდენი ფული ნამდვილად არ მაქვს. ალბათ თითო კილოს ვიყიდი ყველაფერს, რომ სახლში ახალიწლის სუფრა მქონდეს. მგონია, რომ ეს ცოტ-ცოტა ნაყიდიც 300 ლარამდე დამიჯდება“, - გვეუბნება ერთ–ერთი მყიდველი, რომელიც ბაზარს ერთი, მომცრო ზომის ცელოფნის პარკით ტოვებს.

„არავინ არ შემოდის. შარშან ამ დროს იმდენი მყიდველი გვყავდა. რა ქნას ხალხმა, ფული არ აქვთ და ვალებში არიან“, – გეუბნება ხილ–ბოსტნეულზე მოვაჭრე.

მყიდველების სიმცირეს უჩივიან ახალი წლის მთავარი ატრიბუტის ჩიჩილაკისა და ხელოვნური ნაძვის ხეების გამყიდველებიც.

„ხალხს ფული არ აქვს, პროდუქტს ვერ ყიდულობენ და ამათს ვინღა იყიდის“, – ამბობენ ბაზრის გარეთ, ჩიჩილაკების რიგში მდგომი გამყიდველები.

ჩიჩილაკის, ხელოვნური ნაძვის ხეების, მოსართავებისა თუ საახალწლო სხვადასხვა ასაფეთქებელი მასალების მყიდველები ახალციხის ცენტრალურ ქუჩებში უფრო შეიმჩნევა, ვიდრე ახალციხის აგრარულ ბაზარში.

არადა, ახალციხის აგრარულ ბაზარში, შეიძლება ითქვას, რომ ყველა სახის პროდუქტი იყიდება, – მრავალფეროვანი არჩევანით და ასევე, მრავალფეროვანი, მყვირალა ფასებით.

ჩვენ სადღესასწაულო სუფრისთვის საჭირო რამდენიმე პროდუქტის ფასი მოვიკითხეთ. ნახეთ ინფოგრაფიკა



[ლუბა გიორგაძე, ნინო ნარიმანიშვილი, ახალციხე]