ახალციხეში წინასაახალწლო ვაჭრობა პიკს აღწევს

2013 წლის შესახვედრად დიასახლისებმა პროდუქტების შეძენა ახალი წლის დადგომამდე რამდენიმე დღით ადრე დაიწყეს.

”პირველ რიგში ხორცი და ხილი ვიყიდე, ფასები ყოველდღე მატულობს და ვცდილობ ყველაფრის ყიდვა ნაკლებ ფასსში მოვასწრო”,- ამბობს ვალის მკვიდრი ინგა პეტრიაშვილი.

დიასახლისები ამბობენ, რომ ყველაზე მეტად ხორცის პროდუქტების ყიდვას ჩქარობენ. საახალწლო სუფრაზე გოჭი, თევზი და საცივი აუცილებლად უნდა იდოს. გამოკითხული დიასახლისების უმრავლესობა ამბობს, რომ სახაალწლო სამზადისს მთელი მათი დანაზოგი ეწირება.

” საახალწლოდ სულ მცირე 300 ლარი მაინც მჭირდება, ამიტომ ყველაფერს ცოტას ვყიდულობ”, - ამბობს ნინო ზაზაშვილი.

”ალფა მარკეტის” შესასვლელი სავსეა სახელდახელოდ გაკეთებული დახლებით. ბაზრის ტერიტორიაზე დახლის ფასი ექვსი ლარი ღირს. შენობაში ერთი მეტრი კი ორი ლარი. მოვაჭრეები, რომლებიც ბაზარში დგანან, კლიენეტების სიმცირეს უჩივიან.

”გარე ვაჭრობა უნდა აიკრძალოს, თორემ აქ აღარავინ შემოდის. მთელი დღე 50 ლარსაც ვერ ვვაჭრობ და გამოდის, რომ ჩეკის გადასახდელად ვმუშაობ”, -ამბობს ხილის გამყიდველი.

მოვაჭრეები ამბობენ, რომ საახალწლოდ პროდუქტებზე ფასები არ მომატებულა. ბაზრის გარეთ და შიგნით პროდუქტების ფასებში განსხვავება კი 20-30 თეთრია.

27 დეკემბრისათვის ”ალფა მარკეტში” ერთი კილოგრამი პროდუქტის ფასები ასეთია:
კაკალი - 10-დან 20 ლარამდე;
ვაშლი - 1-დან 2 ლარამდე;
მსხალი - 2,50 ლარი;
ყურძენი - 3,50-დან 4 ლარამდე;
ჩირი - 2 ლარი;
ბროწეული - 4 ლარი;
კივი - 1,50-დან 2 ლარამდე;
ბანანი - 3,50 ლარი;
ფორთოხალი - 2,50 ლარი;
ტყლაპი - 7-დან 8 ლარამდე;
თაფლი - 12 ლარი;
თხილი - 4 ლარი;
კიტრი და პომიდორი - 3,50 დან 4 ლარამდე;
ჩურჩხელა, ერთ ცალი, 1-დან 2 ლარამდე;

კვერცხი - 50 თეთრი;
ყველი - 6-დან 8ლარემდე;
ყველი ჩეჩილი - 5 ლარი;
სოკო - 3 ლარი;
მწვანილი - 5 ლარი;
პრასი - 3 ლარი;
ჯონჯოლის მწნილი - 5 ლარი;
კიტრის და პომიდვრის მწნილი - 4 ლარი;
კომბოსტოს მწნილი - 3 ლარი;

ღორის ხორცი - 10- დან 14 ლარამდე;
ძროხის ხორცი - 11-დან 13 ლარამდე;
თევზი, ცოცხალი - 10-დან 15 ლარამდე;
თევზი, გაყინული - 3,50-დან 6 ლარამდე
ქათამი, ცოცხალი - 10-დან 15 ლარამდე;
ქათამი, გაყინული - 5 ლარი;
ბატი - 30 ლარი;
ინდაური - 25-დან 55 ლარამდე;

წინასაახალწლოდ ბაზრის ტერიტორიაზე ნაძვის ხის სათამაშოების, წვიმების, შუშხუნების, ჩიჩილაკების და ხელოვნური ნაძვების ფართო არჩევანია.
საახალწლო აქსესუარების ფასები 1 ლარიდან 60 ლარამდე მერყეობს.

”ბაზარში დღეს მოვედით, ყველაფერი გვაქვს, რომ საახალწლოდ პატარების გულები გავახაროთ, მაგრამ ძალიან ცუდი ვაჭრობაა, დილიდან 50 ლარიც ვერ ვივაჭრე”,- ამბობს გრიგორ სტეფანიანი.

გაძვირებული ფასებისა და ოჯახის მცირე ბიუჯეტის მიუხედავად, საახალწლოდ თითქმის ყველა დიასახლისი ემზადება. ყველა მათგანი 2013 წლის დადგომას უკეთესი მომავლის იმედით ხვდება.

[თინათინ ზაზაძე, ახალციხე]