ასპინძის გამგეობა საახალწლო აქსესუარებისთვის 8 845 ლარს დახარჯავს

ასპინძის მუნიციპალიტეტის კულტურისა სამსახურის ინფორმაციით ადგილობრივი თვითმმართველობა თანხის სიმცირის გამო ტენდერს არ გამოაცხადებს. საახალწლო აქსესუარებს თავად შეიძენენ და მორთავენ კიდეც.

„3 950 ლარი ფოიერვერკებითვის გვაქვს გათვალიწინებული. 4 895 ლარი საახალწლო აქსესუარებისთვის. კოდები სხვადასხვაა, 5 000 ლარს არცერთი არ სცდება და ამიტომ ტენდერის გამოცხადება საჭირო არ არის. ჩვენი სამსახურის და მუნიციპალიტეტის ააიპ–ების დახმარებით ნაძვის ხეს და პარკს ჩვენ მოვრთავთ“, – განაცხადა ასპინძის მუნიციპალიტეტის კულტურის სამსახურის უფროსმა მაკა ბერიძემ.

მისივე თქმით, საახალწლო ნაძვის ხე, ადგილობრივი თვითმმართველობის შენობის გვერდით, გართობისა და დასვენების პარკში მოეწყობა. აქვე დაიდგმება სცენა, სადაც ადგილობრივი ფოლკლორიული, ქორეოგრაფული ანსამბლები და სამუსიკო სკოლა კონცერტს გამართავს.

საახალწლო ღონისძიება დაბაში 21:30 საათზე დაიწყება და 24:00 საათზე ფოიერვერკით დასრულდება.

როგორც ადგილობრივ თვითმმართველობაში განმარტავენ, მწირი ბიუჯეტის გამო პატარებისთვის საახალწლო საჩუქრები გათვალიწინებული არ არის.

[თინათინ ზაზაძე, ასპინძა]