"გირჩი" მოხეს სადავო შენობის სამუფთო სამმართველოსთვის გადაცემას ითხოვს

„გირჩის“ განცხადებას მოხეს სადავო შენობასთან დაკავშირებით "სამხრეთის კარიბჭე" უცვლელად გთავაზობთ.

25 ნოემბერს, პარასკევის ლოცვის შემდეგ, მოხეს მუსლიმმა თემმა გაავრცელა განცხადება და მოითხოვა მოხეს კომისიის გაუქმება და მოხეს მეჩეთის „სადავო“ შენობის მათთვის გადაცემა. განცხადებას ხელს 73 ადგილობრივი მუსლიმი აწერს.

ადიგენის მუნიციპალეტეტის სოფელ მოხეში, მუნიციპალიტეტის საკუთრებაში არსებული და კლუბის სტატუსით რეგისტრირებული შენობა-ნაგებობა, რომელიც ისტორიულად, უტყუარად და დადასტურებულად მეჩეთია, უკვე წლებია დავის საგანია ადგილობრივებს შორის. სოფლის მუსლიმი მოსახლეობა მითითებული შენობის სამუფთოსთვის გადაცემას 2007 წლიდან ითხოვს. თუმცა ხელისუფლებისგან ამ მიმართულებით ერთი ქმედითი ნაბიჯიც კი არ გადადგმულა. დღეს უკვე ცხადია, რომ ე.წ. მოხეს გარემოების შემსწავლელი კომისიის შექმნა ემსახურებოდა დროის კიდევ ერთხელ გაჭიანურებისა და არა პრობლემის სამართლიანად გადაწყვეტის მიზანს.

საქართველოში არსებული სამწუხარო რეალობა ნათლად აჩვენებს, რომ რელიგიური თუ სხვა ნიშნით შევიწროება, დევნა, ფიზიკური და სიტყვეირი ძალადობა უმცირესობების მიმართ ერთ-ერთი ყველაზე მწვავე პრობლემაა.

წლებია საქართველოში რელიგიური და სხვა სახის უმცირესობების შეუწყნარებლობის საფუძველზე ჩადენილ ფიზიკურ თუ სხვა სახის ძალადობას, მთავრობის მხრიდან არაეფექტიანი და არაადეკვატური რეაგირება მოყვება. ხშირად გვქონდა შემთხვევები, როდესაც შეუწყნარებლობის დაგმობის ან აღმოფხვრის ნაცვლად, თავად სამართალდამცავები ან ხელისუფლების წარმომადგენლები არღვევდნენ ადამიანის უფლებებს. განსაკუთრებით აღსანიშნავია საქართველოს მუსლიმი მოქალაქეების მიმართ გამოხატული შეუწყნარებლობის ფაქტები, რომლებთან მიმართებაშიც არსებობს არაერთი გამოუძიებელი საქმე (ნიგვზიანი, წინწყარო, სამთაწყარო, ჭელა და მოხე).

სახელმწიფოს მხრიდან არაადეკვატური რეაგირება მსგავს ფაქტებზე, ისევე როგორც, უსამართლო მიდგომა განსხვავებული რელიგიური თუ სხვა უმცირესობების პრობლემებისადმი, რაც ხდება მოხეს მეჩეთის შემთხვევაში, მხოლოდ ახალისებს შემდგომ შეუწყნარებლობას, არღვევს ადამიანის ფუნდამენტურ უფლებებს და წარმოადგენს საფრთხეს ეროვნული უსაფრთხოებისთვის.

„გირჩი“ მოუწოდებს ხელისუფლების შესაბამის სტრუქტურებს, შეწყვიტონ კომისიების, საბჭოებისა და სამუშაო ჯგუფების შექმნით დროის გაყვანა და სასწრაფოდ დაიწყონ პროცედურები, რათა მოხდეს მოხეს მეჩეთის სახელმწიფო საკუთრებიდან სამუფთოს საკუთრებაში დროული გადასვლა.

[sknews.ge]