„ახალციხის ციხე“ მერიას სცენის შესაძენად თანხას სთხოვს

“ახალციხის ციხის” ტერიტორიაზე ახალი, ასაწყობი სცენის შეძენისთვის თანხის გამოყოფა, რომელიც სავარაუდოდ 80 .000 ლარი ღირს, ციხის დირექტორმა ზაზა თამარაშვილმა მერიაში ქალაქის ბიუჯეტის პროექტის განხილვის დროს მოითხოვა.

„კულტურული ღონისძიებების გარეშე წარმოუდგენელია ეს ობიექტი. პრაქტიკულად სცენა ამორტიზებულია. ახალციხის ციხე საკუთარი ძალებით ასაწყობი სცენის შეძენას ვერ შეძლებს. ჩვენი დიდი სურვილია მომავალი წლის ბიუეჯტში ეს ყველაფერი იყოს ასახული“, – განაცხადა ზაზა თამარაშვილმა.

თამარაშვილის მოთხოვნა გააპროტესტა საკრებულოს დეპუტატმა მამუკა მიქელაძემ. მისი თქმით, თანხა რომელიც ასაწყობი სცენის შეძენისთვის უნდა გამოიყოს, სასურველია სპორტული სკოლის ინფრასტრუქტურის მოსაწყობად დაიხარჯოს.

“სცენა შეკეთდეს და თანხა თუ გვაქვს ის სპორტსკოლას მოხმარდეს. შესულხართ სპორსკოლაში რა ხდება?!“, – განაცხადა მამუკა მიქელაძემ.

ზაზა თამარაშვილის განმარტებით იმის გამო, რომ სცენა გადაუხურავია ხშირად მნიშვნელოვანი ღონისძიებების გადადება ან გაუქმება უხდებათ.

ის, რომ სცენის შეძენისთვის თანხა სოლიდურია ახალციხის მერმა ვლადიმერ ზედგინიძემაც აღნიშნა.

გაიწერება თუ არა თანხა 2017 წლის ბიუეჯტში 80.000–ლარიანი ასაწყობი სცენის შესაძენად ჯერ უცნობია.

[თინათინ ზაზაძე, ახალციხე]