თოჯინების თეატრი ქალაქის ცენტრში შემოდგომით დაბრუნდება

თოჯინების თეატრის ხელმძღვანელის რუსუდან სისაურის განმარტებით, თეატრის რეაბილიტირებულ შენობას, რამდენიმე დღეში ჩაიბარებენ, თუმცა, წარმოდგენების გამართვას ჯერ ვერ შეძლებენ.

„შენობას 29 მაისს ჩავიბარებთ. სცენის გარდა ყველაფერი გარემონტებულია“, – განაცხადა რუსუდან სისაურმა.

მიმდინარე წელს კულტურის სამინისტრომ თოჯინების თეატრის შენობის რეაბილიტაციისთვის 302 775 ლარი გამოყო. ტენდერში გამარჯვებულმა კომპანია „გლობალ ჰაუსმა“ შენობა გაარემონტა, თუმცა სცენის რეაბილიტაცია ამ პროექტში განსაზღვრული არ იყო.

რუსუდან სისაურის განმარტებით, კულტურის სამინისტრო სცენის რეაბილიტაციისთვის ტენდერს რამდენიმე დღეში გამოაცხადებს: „დაახლოებით, 100 000 ლარზე გამოცხადდება ტენდერი“.

მისივე თქმით, სამუშაოების დასრულების შემდეგ უკვე თეატრის შენობა ძველ ადგილს დაუბრუნდება და სპექტაკლების გამართვასაც შეძლებენ: „სცენაც რომ დამთავრდება, ალბათ სექტემბრისთვის გადავალთ ქალაქის ცენტრში".

მას შემდეგ, რაც „თოჯინების თეატრი“ ძველ ადგილს დაუბრუნდება, გათავისუფლებულ ფართში მუზეუმის ადმინისტრაცია განთავსდება.

შეგახსენებთ, რომ დაახლოებით 2012 წლის სექტემბერში თოჯინების თეატრი "ახალციხის ციხეში" გადავიდა. ციხის ტერიტორაზე გადასვლიდან მალევე არასაკმარისი ფართის გამო თეატრის ხელმძღვანელობა უკან ქალაქში დაბრუნებას ითხოვდა. ხუთწლიანი ლოდინის შემდეგ თეატრის ადმინიტრაციის მოთხოვნა სრულდება.

რუსუდან სისაურის განმარტებით იმის გამო, რომ „ახალციხის ციხეზე“ პატარები სპაქტაკლის საყურებლად არ დადიან, იძულებულები არიან, რომ სპექტაკლებს სკოლებსა და ბაგა–ბაღებში წაიღონ და იქ ჩაატარონ.

[თინათინ ზაზაძე, ახალციხე]