მესხეთის თეატრში სცენის მოსაწყობად გამოცხადებული ტენდერი ჩაიშალა

მესხეთის თეატრმა ტენდერი 15 თებერვალს გამოაცხადა. წინადადებების მიღება დღეს, 22 თებერვალს დასრულდა. ტენდერში მონაწილეობა არცერთ პრეტენდენტს არ მიუღია.

გამარტივებული ელექტრონული ტენდერი 20.8120 ლარზე იყო გამოცხადებული.

როდის გამოაცხადებენ ახალ ტენდერს, მესხეთის თეატრის ადმინისტრაციაში ამ ეტაპზე პასუხი არ აქვთ. თეატრის დირექტორი ირაკლი ათუნაშვილი ამბობს, რომ გადაწყვეტილებას მას შემდეგ მიიღებს, როდესაც სატენდერო კომისიის წევრებს შეხვდება.

„პირობებში წერია, რომ ტენდერში მონაწილეობის უფლება აქვთ კომპანებს, რომელთა ბრუნვა წელიწადში 100.000 ლარზე მეტია. ასევე, უნდა ჰქონდეს მინიმუმ 2 წლის გამოცდილება. შესაძლებელია პირობები შევცვალოთ: თანხას დავუწევთ. ამის შემდეგ ისეთი კომპანიები მიიღებენ მონაწილეობას, რომლის ბრუნა წელიწადში მაგალითად 80 ლარია, ან უფრო ნაკლები“.

შეგახსენებთ, რომ მესხეთის თეატრის სახელმწიფო დრამატული თეატრის სარეაბილიტაციო სამუშაოებისთვის კულტურის სამინისტრომ 140 ათასი ლარი გამოყო. სარეაბილიტაციო სამუშაოებს შპს „ქრისტინე სარაშვილი“ ასრულებდა, იმის გამო, რომ აღნიშნულმა შპს–მ სცენაზე ხარისხიანი მასალა ვერ დააგო და სამუშაოებიც დროში გაიწელა, კომპანია დაჯარიმდა და ხელშეკრულებაც შეუწყდა. თეატრის ადმინისტრაციას იატაკის მოსაწყობად ტენდერის გამოცხადება ისევ მოუწია.

[თინათინ ზაზაძე, ახალციხე]