სამუსიკო სკოლის დირექტორი: ‘ბავშვს ქოლგა უნდა ეჭიროს, რომ გაკვეთილი ჩაუტარო’

დღეს, 18 ნოემბერს, ახალციხის საკრებულოს სხდომაზე, ახალციხის სამუსიკო სკოლის დირექტორმა ადგილობრივ თვითმმართველობას ანგარიში წარუდგინა და ავარიული შენობის რემონტთან დაკავშირებით დახმარება ითხოვა;

ცისანა ახვლედიანმა სკოლის მუშაობისა და წარმატებების შესახებ ისაუბრა. მისი თქმით, საქართველოში არსებულ სამუსიკო სასწავლებლებს შორის ახალციხის სკოლა ერთ–ერთი მოწინავეა, თუმცა ფინანსური სიმწირის გამო ხშირად მოსწავლეები სხვადასხვა კონკურსებში მონაწილეობას ვერ იღებენ, მიწვევის შემთხვევაში კი კონცერტებზე ვერ მიდიან.

„9 მოსწავლე გვყავდა შარშან მარმარისში და ვერ გავუშვით, შემდეგ კიდევ ბაქოში. იქნებ შეიტანოთ ცვლილება ბიუეჯტში და რაღაცა თანხა გამოინახოთ სამომავლოდ ამისთვის“, – განაცხადა საკრებულოს სხდომაზე ახვლედიანმა.

სამუსიკო სკოლის დირექტორმა თვითმმართველობის წინაშე სხვა უფრო მნიშვნელოვანი პრობლემის გადაჭრაც ითხოვა: „დღეს დილით რომ შემოსულიყავით სკოლაში, იატაკები სველი იყო. ჭერიდან წყალი ჩამოდის და ორი როიალი უკვე გამიფუჭდა. ახლა საკონცერტო დარბაზში რომ როიალები მიდგას, მეშინია წყალმა ისინიც არ გააფუჭოს. ბავშვს ქოლგა უნდა ეჭიროს, რომ გაკვეთილი ჩაუტარო. ქვებიც ცვივა ჭერიდან“.
დეპუტატებმა სხდომაზე განაცხადეს, რომ არსებული ვითარების შესახებ იციან.

„ყველა შეკრებაზე ვაყენებ ამ საკითხს და მეუბნებით, ვიცითო. რომ იცით, გასაგებია, მაგრამ მხოლოდ ცოდნა საქმეს ვერ შველის“, – უპასუხა ახვლედიანმა.

როგორც სხდომაზე მერის მოვალეობის ყოფილმა შემსრულებელმა ილია ზარდიაშვილმა განაცხადა, ინფრასტრუქტურის სამსახურს სამუსიკო სკოლის სახურავის სახარჯთაღრიცხვო დოკუმენტები უკვე მზად აქვს და მალე შესყიდვების სამსახური ტენდერს გამოაცხადებს.
„არა მარტო სახურავი, მთელი შენობა ავარიულია, იქნებ მომავალი წლის ბიუჯეტში მთლიანი შენობის რემონტი გაითვალისწინოთ“, – მიმართა დეპუტატმა ჯიმშერ გოგოლაურმა ქალაქის ახალ მერს ვლადიმერ ზედგინიძეს.

ზედგინიძს თქმით, შენობა ისტორიულია, ის წლების წინ ორბელიანების სასახლე იყო და ამიტომ მისი რესტავრირებისას კულტურის სამინისტროს ჩართვაც დასჭირდებათ.

ახალციხის სამუსიკო სკოლა 60 წლისაა, აქ 200–მდე მოსწავლე სწავლობს და მათ 40 თანამშრომელი ემსახურება;

[თამუნა უჩიძე, ახალციხე]