ახალციხის სამუსიკო სკოლის გუნდმა გრან-პრი მოიპოვა

სამუსიკო სკოლის გაერთიანებულ გუნდში ცხრამეტი მოსწავლეა. გუნდის სოლისტი ნიკა ბერიძეა. მათ გრან-პრი ქორმაისტერისა და კონცერტმაისტერის, მონაზონ ნინო სარაშვილის ხელმძღვანელობით მოიპოვეს.

„მთელი წლის განმავლობაში ვემზადებოდით, დედა ნინოს ძალისხმევის გარეშე, ეს შედეგი არ გვექნებოდა. ჟიურის წევრებმა აღნიშნეს, რომ პირველად მოხდა, როდესაც გრან-პრი რეგიონში წავიდა,“ – ამბობს სამუსიკო სკოლის დირექტორი ცისანა ახვლედიანი.

ორ ივნისს გამართულ კონკურსში საქართველოს სხვადასხვა რეგიონებიდან სამუსიკო სკოლების სამოცზე მეტი გუნდი მონაწილეობდა. კონკურსში გამარჯვებულები შაორის ტბაზე, „მომავლის ბანაკში“ გაემგზავრებიან.

[ავთო ინასარიძე, ახალციხე]