სოფელ უდესთან მომხდარ ავტოავარიას ერთი პირი შეეწირა

სოფელ უდესთან ავარია 4 ნოემბერს მოხდა. ერთმანეთს ადიგენი–თბილისის მიმართულებით მიმავალი სამგზავრო "მიკტროავტობუსი" და ჯიპის მარკის ავტომობილი შეეჯახნენ. შემთხვევის შედეგად, „მიკროავტობუსში“ მყოფი რამდენიმე ადამიანი დაზიანდა.

დაზარალებულებს შორის იყო სოფელ მლაშეში მცხოვრები 45 წლის მამაკაცი, რომელიც მძიმე დაზიანებების გამო, სამკურნალოდ თბილისში გაიყვანეს. როგორც მისი ახლობლები განმარტავენ, დაზარალებულს ხერხემლის მეექვსე და მეშვიდე მალების დაზიანება ჰქონდა, ჩაუტარდა ოპერაცია, თუმცა სიცოცხლის შენარჩუნება ვერ მოხერხდა.

შემთხვევაზე თავდაპირველად გამოძიება სისხლის სამართლის კოდექსის 276–ე მუხლის პირველი პუნქტით მიმდინარეობდა, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია. თუმცა ამ ეტაპზე, შშს–ს ინფორმაციით, საქმე გადაკვალიფიცირდება. მუხლი იგივე დარჩება და შეიცვლება ნაწილი.

"გამოძიება გრძელდება, ექსპერტიზებია დანიშნული. საქმე გადაკვალიფიცირდება“, – განმარტავენ შსს–ში.

[თაკო ფეიქრიშვილი, ადიგენი]