,,მტკვარიჰესის“ მშენებლობაზე მუშები გაიფიცნენ

ასპინძის მუნიციპალიტეტის სოფელ რუსთავთან, ,,მტკვარიჰესის“ სათავე ნაგებობის მშენებლობაზე დასაქმებული მუშები დღეს, 2 ნოემბერს, დილიდან გაიფიცნენ. ისინი სამუშაო პირობებს აპროტესტებენ. ამბობენ, რომ ხელშეკრულება გაფორმებული არ აქვთ.

მათივე თქმით, თავიდან ხელფასს დღიურად იღებდნენ, ბოლო ორი თვის განმავლობაში კი თანხა გამომუშავების მიხედვით აუნაზღაურდათ.

,,ხელფასს შესრულებულ სამუშაოზე გვიხდიან, ჯერ ერთი ინჟინერი მოდის და გვეუბნება ასეთი სისქის ალბმატურები გააკეთეთო, მერე მეორე მოდის და ცვლის ამ გადაწყვეტილებას. ამის გამო, ფაქტობრივად, სამუშაო ვეღარ სრულდება ბოლომდე და ხელფასიც არ გვაქვს. ველოდებით რას გადაწყვეტს ხელმძღვანელობა“ – აცხადებენ გაფიცული თანამშრომლები.

მათივე განმარტებით, ბოლო ერთი კვირის განმავლობაში, დაუსაბუთებელი მიზეზით, კომპანიამ 50–მდე ადამიანი გაათავისუფლა.

ამ დრიოსათვის, აქციის მონაწილეები მშენებელი კომპანიის, ,,საქენერგორემონტის“ წარმომადგენლების მისვლას ელოდებიან. ადგილზე მუშაობს ,,სამხრეთის კარიბჭის“ კორესპონდენტიც.

შეგახსენებთ, რომ სამცხე–ჯავახეთში ,,მტკვარიჰესის“ მშენებლობას კომპანია ,,საქენერგორემონტი“ 2016 წლის 17 მარტიდან ახორციელებს, პროექტი 2019 წელს დასრულდება.

პროექტის ღირებულება 33 200 000 დოლარია, მისი დამკვეთი კი შპს ,,მტკვარჰესი“.

[თინათინ ზაზაძე, თაკო ფეიქრიშვილი, ასპინძა]