საროში მუშები ისევ გაფიცვას აანონსებენ

სარო–ხიზაბავრის სარწყავი წყლის მაგისტრალის მშენებლობაზე გაფიცული მუშები კუთვნილი ხელფასის მიღების მოითხოვნით ისევ გაფიცვას აპირებენ.

„გვითხრეს, რომ დღეს მოგვცემენ მარტის ხელფასის ნახევარს. ნახევარს იმიტომ რომ 200 ლარი პირველად რომ გავიფიცეთ მაშინ მოგვცეს ავანსად. მაგრამ აპრილის ხელფასს როდის მივიღებთ არავინ გვეუბნება“, – ამბობს ერთ–ერთი მუშა ანზორ გიორგაძე.

როგორც მშენებლობაზე დასაქმებულები აცხადებენ, თუ დღეს 17 მაისს, მარტისა და აპრილის ხელფასს სრულად არ დაურიცხავენ, ხვალ დილიდან მუშაობას აღარ განაახლებენ.

შეგახსენებთ, რომ სარო–ხიზაბავრის სარწყავი წყლის მაგისტრალზე დასაქმებული მუშები 11 მაისს გაიფიცნენ. მათი მოთხოვნა ორი თვის ხელფასის დარიცხვა იყო. პროტესტი მხოლოდ ერთ დღეს გაგრძელდა. დამსაქმებელი კომპანიის ხელმძღვანელების მხრიდან მიღებული დაპირების გამო, მუშებმა მუშაობა მეორე დღესვე განაახლეს, თუმცა მათ მხოლოდ 200–200 ლარი ავანსად მიიღეს.

[თამუნა უჩიძე, ასპინძა]