ასპინძაში მუშები გაიფიცნენ

დაბა ასპინძაში სასმელი წყლის სარეაბილიტაციო სამუშაოებს, რისთვისაც 1,800,000 ლარია გათვალისწინებული, ტენდერში გამარჯვებული აზერბაიჯანული კომპანია ”აზერი” ახორციელებს. სამუშაოებზე 35 ადამიანია დასაქმებული.

ერთ კვირაზე მეტია, მუშების ნაწილი გაფიცულია. ისინი ოთხი თვის სახელფასო დავალიანებას ითხოვენ. გაფიცულები აცხადებენ, რომ პროტესტს იქამდე გააგრძელებენ, ვიდრე ხელფასს არ მიიღებენ.

”დეკემბრის თვიდან ხელფასები არ მიგვიღია. გვპირდებიან, მაგრამ ჯერ არავის ჩაურიცხავს. სანამ დავალიანებას სულ არ დაფარავენ, მუშაობას არ გავაგრძელებთ”, - ამბობს რეზო ადეიშვილი.

ხელფასის დაგვიანება თანამშრომლების ნაწილმა გააპროტესტა, ნაწილი კი სარეაბილიტაციო სამუშაოებს კვლავ აგრძელებს.

” ხელფასი არცერთ თანამშრომელს არ გვაქვს მიღებული, მაგრამ მარტო ადგილობრივები გაიფიცნენ, ჩამოყვანილი მუშები მუშაობას აგრძელებენ”, - ამბობს კომპანია ”აზერის” თანამშრომელი, რომელიც ვინაობის გამხელისგან თავს იკავებს.

”აზერის” სამუშაოთა მწარმოებელი მურმან შეყელაშვილი თანამშრომლების გაფიცვას უარყოფს. ხელფასების დაგვიანების მიზეზად, კი დოკუმენტების მოუწესრიგებლობას ასახელებს.

”ჩვენ უცხოელი ინვესტორები გვყავს და თუ სამუშაოების 15 პროცენტი არ შევასრულეთ, შესრულებულ სამუშაოზე ხელს არ გვიწერენ. ამიტომ დაგვიანდა ხელფასები. ამჟამად თბილისში ვიმყოფები, რამდენიმე დღეში დავალიანებას გავცემთ”, - გვითხრა სატელეფონო საუბარში მურმან შეყელაშვილმა.

სასმელი წყლის სარეაბილიტაციო სამუშაოების პროექტს მუნიციპალური განვითარების ფონდი აფინანსებს. პროექტის დასრულების შემდეგ ასპინძას სასმელი წყალი 15 კილომეტრის მოშორებით, ახალქალაქის მუნიციპალიტეტის სოფელ ხანდოდან უნდა მოეწოდოს. პროექტის თანახმად, 300 მ3 ტევადობის რეზერვუარი შენდება, ეწყობა სათავე ნაგებობა და 15 კმ სიგრძის მილსადენი.

[თინათინ ზაზაძე, ასპინძა]