საკრებულომ ინფექციების კონტროლისთვის მეთოდური რეკომენდაცია დაამტკიცა

„საზოგადოებრივი ჯანმრთელობის შესახებ“ კანონში შესული ცვლილებების შესაბამისად, ქალაქ ახალციხის მუნიციპალიტეტის საკრებულომ, ის მეთოდური რეკომენდაციები და კითხვარის ფორმა დაამტკიცა, რომლებიც ესთეტიკური და კოსმეტიკური პროცედურების წარმოებისას, ინფექციების პრევენციისა და კონტროლისათვის არის საჭირო.

კანონის მიხედვით, ესთეტიკურ ცენტრებისა და სილამაზის სალონებისათვის, ოქტომბრის თვიდან რეგისტრაცია სავალდებულო გახდა. ამ კუთხით მომუშავე ყველა ფიზიკური და იურიდიული პირი, ეკონომიკურ საქმიანობათა რეესტრში უნდა დარეგისტრირდეს. ამისათვის მათ საჯარო რეესტრის ეროვნულ სააგენტოს უნდა მიმართონ.

გარდა ამისა, ოქტომბრის თვიდანვე დაიწყო სალონებსა და ესთეტიკურ ცენტრებში სანიტარული ნორმების კონტროლი დაიწყო. მონიტორინგს საზოგადოებრივი ჯანდაცვის სამსახურები მთელი ქვეყნის მასშტაბით ახორციელებენ.

როგორც ახალციხის საზოგადოებრივი ჯანდაცვის ცენტრის ხელმძღვანელი, ფატი ხაბულიანი აღნიშნავს, ამ დროისათვის ქალაქში მოქმედი ასამდე ფიზიკური პირი, ინდ. მეწარმე უკვე დარეგისტრირებულია.

„ჩვენ აღვწერეთ რამდენია ასეთი დაწესებულება, როგორც ფიზიკური, ასევე იურიდიული პირი. ჩავუტარეთ ტრენინგი, დავურიგეთ მთავრობის დადგენილება, სადაც გაწერილი იყო რა პირობებსა და რა მოთხოვნებს უნდა აკმაყოფილებდეს ამ კონკრეტულ საქმიანობაზე მომუშავე ფიზიკური თუ იურიდიული. რამდენადაც ინფორმაცია გვაქვს, ისინი დარეგისტრირედნენ“, – განმარტა ქალაქ ახალციხის საკრებულოს დეპუტატებთან ფატი ხაბულიანმა.

მისივე თქმით, ამ ეტაპზე სალონებში კონტროლი უკვე მიმდინარეობს. თუკი აღმოჩნდება ისეთი შემთხვევა, რომ მსგავს საქმიანობაზე მომუშავე იურიდიული ან ფიზიკური პირი რეგისტრირებული არ იქნება, მას მუშაობა ეკრძალება და დაჯარიმდება.

ჯანდაცვის სამინისტროს ინფორმაციით, ჯარიმა 50 ლარიდან 1000 ლარამდე განისაზღვრება, რაც იმაზეა დამოკიდებული რამდენჯერ მოხდება დაჯარიმება.

„საზოგადოებრივი ჯანმრთელობის შესახებ“ კანონში შესული ცვლილება C ჰეპატიტის ელიმინაციის პროგრამის ფარგლებში შედის და იგი ინფექციების პრევენციისა და სანიტარული ნორმების დაცვის მიზნით ხორციელდება.

[თაკო ფეიქრიშვილი, ახალციხე]