ჯანდაცვის ცენტრმა ახალციხის სალონები შეამოწმა

ახალციხის საზოგადოებრივი ჯანდაცვის ცენტრის წარმომადგენლის, თემურ ზაქროშვილის თქმით, წლის განმავლობაში სალონებში იყო გარკვეული ხარვეზები, თუმცა აღმოიფხვრა, ამიტომ ადმინისტრაციული სამართალდარღვევათა ოქმის შედგენა საჭირო აღარ გახდა.

„სალონები ცდილობენ დაიცვან ყველა სტანდარტი, ჩვენ კი სისტემატურად ვამოწმებთ და მუდმივად ვიცით რა მდგომარეობაა“ ,- ამბობს თემურ ზაქროშვილი.

ჯანდაცვის ცენტრმა, ადმინისტრაციულ სამართალდარღვევის ოქმებით სილამაზის სალონების შემოწმება 2019 წლის იანვრიდან დაიწყო. ოქმის ფორმა ახალციხის მუნიციპალიტეტის საკრებულომ დაამტკიცა.

სილამაზის სალონებისთვის ახალი ტექნიკური რეგლამენტი 2016 წლის იანვარში ამოქმედდა, რომლის მიხედვითაც სალონებში ინვენტარი უნდა განახლებულიყო და ჰიგიენური წესებიც დაეცვათ. ამავე წლის ოქტომბრიდან ახალი რეგულაციების გათვალისწინება ყველა სალონისთვის სავალდებულო გახდა.

რეგულაციების მიხედვით სალონებს მუშაობის წესის, ინსტრუმენტების, ავეჯის, ნარჩენების გატანის, სტერილიზაციის და სხვა პროცედურების შეცვლა მოუხდათ. თუმცა, მანამდე ისინი „საზოგადოებრივი მნიშვნელობის დაწესებულებებად“ უნდა დარეგისტრირებულიყვნენ. როგორც „სამხრეთის კარიბჭეს“ სალონებში განუცხადეს სტატუსიც შეიცვალეს და დანადგარებიც შეიძინეს.

[ლუბა გიორგაძე, ახალციხე]