ახალციხეში სილამაზის სალონებს შეამოწმებენ

ახალციხის მუნიციპალიტეტის საკრებულომ, ადმინისტრაციულ სამართალდარღვევათა ოქმის ფორმის შევსების, ჩაბარების, წარმოებისა და აღრიცხვა–ანგარიშგების წესი დღეს, 7 სექტემბერს, გამართულ სხდომაზე დაამტკიცა. დადგენილება ძალაში დღეიდანვე შევიდა.

ოქმი ააიპ „ახალციხის მუნიციპალიტეტის საზოგადოებრივი ჯანდაცვის ცენტრს“ გადაეგზავნება, ამის შემდეგ კი მისი თანამშრომლები სალონების შემოწმებას დაიწყებენ და დარღვევის შემთხვევაში ოქმსაც შეადგენენ.

სილამაზის სალონებისთვის ახალი ტექნიკური რეგლამენტი 2016 წლის ინავარში ამოქმედდა, რომლის მიხედვითაც სალონებში ინვენტარი უნდა განახლებულიყო და ჰიგიენური წესებიც დაეცვათ. ამავე წლის ოქტომბრიდან ახალი რეგულაციების გათვალისწინება ყველა სალონისთვის სავალდებულო გახდა. თუმცა, ის თუ რამდენად იცავენ ჰიგიენურ ნორმებს სალონები, ამისი კონტროლი ახალციხის საზოგადოებრივი ჯანდაცვის ცენტრს უნდა ეწარმოებინა. ამ დრომდე კი კონტროლის განსახორციელებლად ადმინისტრაციულ სამართალდარღვევათა ოქმის წარმოების წესი საკრებულოს დამტკიცებული არ ჰქონდა.

ახალციხის მუნიციპალიტეტის მასშტაბით სულ 30–მდე სალონია და 100–მდე თანამშრომელია დასაქმებული.

[ლუბა გიორგაძე, ახალციხე]