მუნიციპალიტეტში სახნავი მიწების აღრიცხვა დასრულდა

სახნავი მიწების აღწერა სამი კატეგორიის მიხედვით მოხდა. სოფლის მოსახლეობის იმ ნაწილს, რომელიც თავს სოფლის მეურნეობით ირჩენს და ჰექტარი და 25 მეასედი მიწის ნაკვეთი აქვს, პირველი კატეგორია მიენიჭა. რაც შეეხება მეორე კატეგორიას, მას მოსახლეობის ის ნაწილი განეკუთვნება, რომელიც 75 მეასედ მიწის ნაკვეთს ფლობს.

”მეორე კატეგორიაში ის მოსახლეობა შედის, რომელი ქალაქში ცხოვრობს და სოფელში მცირე მიწის ნაკვეთებით სარგებლობს. მოსახლეობა ძირითადად ორ კატეგორიად იყო დაყოფილი, მაგრამ მერე რატომღაც მოხდა მესამე კატეგორიის დამატებაც, სადაც იგულისხმება ის ოჯახები, რომლებიც ქალაქში ცხოვრობენ, მაგრამ გარკვეული ტერიტორია სოფელშიც აქვთ და არ უნდათ ამის დაკარგვა”, - განმარტავს ახალციხის მუნიციპალიტეტის გამგებლის მოვალეობის შემსრულებელი ბესიკ ხითარიშვილი.

ტერიტორიული ორგანოს რწმუნებულების თქმით, სახნავი მიწების აღრიცხვა თითქმის ყველა სოფელში დასრულდა. პრობლემას მხოლოდ მესამე კატეგორიის მოსახლეობა წარმოადგენს, რომლებიც ქალაქში ცხოვრობენ და ადგილზე მისვლას ვერ ახერხებენ.

”დღეს ჩაბარდება ყველა საბუთი და გადაეგზავნება ინფორმაცია სამინისტროს. მესამე კატეგორია ჩემთანაც დარჩენილია, მაგრამ ეს ძირითადად ის ხალხია, რომელიც საერთოდ არ ცხოვრობს ვალეში”, - ამბობს ვალის ტერიტორიული ორგანოს რწმუნებული ზურა ნასყიდაშვილი.

მუნიციპალიტეტის ტერიტორიაზე სახნავი მიწების აღრიცხვის შემდეგ მიწის გაკვეული რაოდენობის უფასოდ მოხვნა დაიწყება.

”პროგრამა, რომელიც მიმდინარე წელს ამოქმედდა ითვალისწინებს სახნავი მიწების დამუშავებას, რაც გულისხმობს პირველად დამუშავებას, ანუ ეს არის საგაზაფხულო ხვნები, კულტივაცია, დათესვამდე მიყვანა და სასუქით უზრუნველყოფა”, - განმარტავს ხითარიშვილი.

მისივე თქმით, ის ოჯახები, რომელბიც ქალაქში ცხოვრობენ, სოფელში კი საკუთარი სახლი აქვთ და არ გააჩნიათ სახნავი მიწა, აღნიშნულ დახმარებას ვერ მიიღებენ.

[თამარ თოთაძე, ახალციხე]