ახალციხეში სახნავი მიწების აღრიცხვა დაიწყო

გამგეობაში ამბობენ, რომ სამზადისი წინასწარ დაიწყეს, რადგან საგაზაფხულო სამუშაოების დროს, არცერთი გლეხის მიწა დაუმუშავებელი არ უნდა დარჩეს.

- ”სიები გადმოგვეცა. დავდივართ სოფლებში და ჩვენ თვითონ ვიწერთ, რამდენი აქვთ სახნავი და რამდენი ხეხილის ბაღები. გარდა ამისა, საჭიროა მიწის მესაკუთრის პირადი ნომერი და დაბადების წელი”, - ამბობს აწყურის ტერიტორიული ორგანოს რწმუნებული შუქრი გოგოლაძე.

გამგეობაში ამბობენ, რომ რამდენი მეასედის მოხვნა შეეძლება უფასოდ თითოეულ ოჯახს ჯერ არ იციან.

- ”ამ კვირაში მოგვაწვდიან იმ ზღვრებს, რომლის საშუალებითაც იხელმძღვენელებს სოფლის მეურნეობის სამინისტრო”, - გვითხრა მუნიციპალიტეტის გამგებელმა ბესიკ ხითარიშვილმა.

გამგეობის ადმინისტრაციაში ამბობენ, რომ საჭიროა აღდგეს მიწათმომწყობის სამსახური, რათა შემდგომში არ აღმოვჩნდეთ იმ მწარე რეალობის წინაშე რაშიც დღეს ვართ.

- ”არ ვიცით, სად გადის ტერიტორიულ ორგანოებს შორის ზღვარი, არ ვიცით ვის რამდენი მიწის ნაკვეთი აქვს და აქედან რამდენს ამუშავებს. ჩვენ თავიდან ვიწებთ ამ სამსახურის საქმის კეთებას. ჯობია აღდგეს ის სამსახური რომლის პირდაპირი მოვალეობაა იმ ნახაზების შედგენა, რასაც ტერიტორიული ორგანოს რწმუნებულები აკეთებენ”, - განაცხადა ხითარიშვილმა.

შეგახსენებთ, მმართველი პარტიიის წინასაარჩევნო დაპირება, სოფლის მეურნეობის განვითრების ხელშეწყობის მილიარდიანი პროგრამა გაზაფხულიდან ამოქმედდება.

[თინათინ ზაზაძე, ახალციხე]