ინფორმაცია მიწის რეგისტრაციის მსურველთათვის

ზინაიდა თედიაშვილი ბორჯომის მუნიციპალიტეტის, სოფელ პატარა მიტარბში ცხოვრობს. ამბობს, რომ სოფელში მიწა აქვს, რომლის გაფორმებაც თავის სახელზე უნდა, მაგრამ ვერ ახერხებს. მის მსგავსად, ბევრია, ვისაც სასოფლო–სამეურნეო მიწის ნაკვეთები ოფიციალურად არ აქვთ დარეგისტრირებული.

„სოფელში გვაქვს მიწები, რომლებიც იყო მამამთილის სახელზე, მამათილი ამუშავებდა, თიბავდა. ის გარდაიცვალა, ახლა მინდა გადმოფორმება ჩემზე. ჰექტარი და 30 მეასედი მიწაა. შევარდნაძის დროინდელი რაღაც ქაღალდები გვაქვს, მაგრამ არ ვიცი კიდევ რა სჭირდება ჩემს სახელზე გადმოფორმებას“, – ამბობს ზინაიდა თედიაშვილი.

სასოფლო–სამეურნეო მიწის ნაკვეთს განეკუთვნება ის მიწის ნაკვეთი, რომლის გამოყენება ხდება სასოფლო–სამეურნეო მიზნით. ასეთია საძოვარი, სათიბი, სახნავი (მრავალწლიანი ნარგავებით დაკავებული, საბაღე, საბოსტნე) და საკარმიდამო მიწის ნაკვეთი.

მიწის ნაკვეთებზე უფლებათა სისტემური და სპორადული რეგისტრაციის სპეციალური წესისა და საკადასტრო მონაცემების სრულყოფის შესახებ რეფორმის მიხედვით, თუ თქვენ ხართ მიწის მფლობელი, სასოფლო–სამეურნეო მიწის ნაკვეთებზე საკუთრების უფლების რეგისტრაცია თქვენთვის უფასოა.

პირადობისა და მიწის საკადასტრო აზომვითი ნახაზი უნდა წარადგინოთ საჯარო რეესტრში და მოითხოვოთ საკუთრების უფლების რეგისტრაცია.

ყველა საჭირო საარქივო თუ სხვა დოკუმენტაციის მოძიებას საჯარო რეესტრი ახორციელებს.

კანონი 2018 წლის ივნისიდან მოქმედებს. მისი მოქმედების ვადა 2020 წლის პირველ იანვრამდეა.

ზინაიდა თედიაშვილს და მიწების რეგისტრაციის სხვა მსურველებს შეუძლიათ მიმართონ ახლომდებარე მუნიციპალურ ცენტრებში არსებულ იუსტიციის სახლებს.

სტატისტიკური მონაცემებით, რეფორმის დაწყებიდან 2019 წლის მაისის მდგომარეობით უკვე რეგისტრირებულია 661 100-ზე მეტი მიწის ნაკვეთი.

[გულო კოხოძე, ბორჯომი]