ახალციხის მუნიციპალიტეტის სახანძრო დაცვის სამსახურში ხელმძღვანელი მიმდინარე წლის დასაწყისში შეიცვალა. პაატა კბილაშვილი ამ თანამდებობაზე მუნიციპალიტეტის გამგებლის მოვალეობის შემსრულებლის გადაწყვეტილებით დაინიშნა. ბესიკ ხითარიშვილის განმარტებით სახანძრო დაცვის სამსახურის ყოფილმა ხელმძღვანელმა პაატა ლეკიშვილმა თანამდებობა პირადი განცხადების საფუძველზე დატოვა.
- „ნებისმიერი სამსახურის უფროსი, რომელიც შეიცვალა, საკუთარი განცხადების საფუძველზეა გათავისუფლებული. ეს ჩვეულებრივი მოვლენაა. მაგალითად რწმუნებულების შეთხვევაში, თანხა გამოყოფილი იყო და სამუშაო ვერ შეასრულეს, ეს მათი უნიათობის ბრალია, - განმარტავს ბესიკ ხითარიშვილი და ამატებს, რომ ყველა სამსახურის მუშაობას მოწვეული აუდიტი სწავლობს, რომელიც დეტალურ დასკვნას დადებს, - არ გამოვრიცხავ, რომ ამის შემდეგ შეიძლება რიგი ადამიანების პასუხისმგებლობის საკითხიც დადგეს. თუ დარღვევები იქნება, ამ ინფორმაციას პროკურატურას გადავცემ“.
ახალი უფროსი სახანძრო დაცვის სამსახურის პრობლემებს უკვე გაეცნო. მისი თქმით, ყველა პრობლემა, რომელიც სამსახურში არსებობს გამგებლის მოვალეობის შემსრულებელს უკვე შეატყობინა და მისგან დაპირებაც მიიღო, რომ დაეხმარებოდა.
ბესიკ ხითარიშვილის თქმით, ტექნიკა, რომელიც სახანძრო დაცვის სამსახურს ამ ეტაპზე ჰყავს, თითქმის 20-30 წლის განმავლობაში არ გამოცვლილა. სამსახურს პროფესიონალი კადრების პრობლემაც აქვს.
ახალციხის მუნიციპალიტეტის სახანძრო დაცვის სამსახური მხოლოდ მუნიციპალიტეტის ტერიტორიას ემსახურება. თუმცა, სახანძროში ამბობენ, რომ საჭიროების შემთხვევაში მეზობელ რაიონებშიც უწევთ გასვლა. სახანძრო დაცვის სამსახურში ამ ეტაპზე 27 თანამშრომელია. მათ შორის, ოთხი მეხანძრე ქალაქ ვალეს ემსახურება, სადაც ერთი მანქანა მუდმივად მზადყოფნაშია. ახალციხეში კი სამი სახანძრო მანქანა მუშაობს.
- ”ადრე წელიწადში რამდენჯერმე ხდებოდა თანამშრომლების გადამზადება, ახლა ეს ყველაფერი პრობლემაა. კადრებიც არაა საკმარისი. როგორ შეიძლება ვალის სახანძრო დაცვის სამსახურში ოთხი თანამშრომელი მუშაობდეს?” - ამბობს გამგებლის მოვალეობის შემსრულებელი.
კადრების სიმცირეზე სახანძრო დაცვის სამსახურშიც საუბრობენ.
„პირველ რიგში საშტატო ერთეული უნდა დაემატოს. ინვენტარიც მოძველებულია და ახლის შეძენა გვინდა. მეხანძრეების უნიფორმა და სპეციალური ტანსაცმელიც გვჭირდება. ყველაფერი ეს უფროსმა მოხსენებაში ჩაწერა და გამგეობაში მიტანილია“, - ამბობს დავით ტალახაძე.
სახანძრო დაცვის სამსახურში ამბობენ, რომ ერთ-ერთი პრობლემა მაქნანის წყლის ავზის დაბალი ტევადობაა.
- „გამგებელი გვპირდება, რომ მანქანებს შევცვლით. ერთ მანქანაში ორი ტონა წყალი ეტევა. მოთხოვნა უკვე გაკეთებულია, რომ იქნებ ოთხ ტონიანი, ან ექვს ტონიანი მანქანები შეგვისყიდონ“, - განმარტავს კბილაშვილი და ამატებს, რომ დიდი ტევადობის მანქანების არსებობის შემთხვევაში ხარჯიც ნაკლები იქნება.
გამგებლის მოვალეობის შემსრულებლის თქმით, მეხანძრეებს არც საჭირო აღჭურვილობა და ტანსაცმელი აქვთ: ”დიდი ხანძარი რომ მოხდეს, აირწინაღებიც კი არ აქვთ”.
სახანძრო დაცვის სამსახურმა 2008 წელს უკრაინიდან საჩუქრად ორი სახანძრო მანქანა მიიღო, მათ შორის ერთი ვალეს, ერთი კი ახალციხეს ემსახურება.
- „მაგრამ ისინიც ორ-ტონიანია. სტაციონარს ეძახიან, ხანძრის დროს მანქანა ერთ ადგილას დგას და წყალს ბასეინიდან იღებს და ისე აფრქვევს. ყოფილა დიდი ხანძრები, როცა მანქანა წყლის ასაღებად მდინარეზე წასულა ან ორი მანქანით უნდა გახვიდე და ერთმანეთს ჩაენაცვლოს“, - ამბობს ახალციხის სახანძრო დაცვის სამსახურის თანამშრომელი დავით ტალახაძე.
ახალციხის მუნიციპალიტეტის გამგეობის დაქვემდებარებაში არსებულ სამსახურებში საკადრო ცვლილებები გამგებლის მოვალეობის შემსრულებლის დანიშვნის შემდეგ მიმდინარეობს. სახანძრო დაცვის სამსახურის ახალი უფროსი საკადრო ცვლილებების განხორციელებას არ აპირებს.
პაატა კბილაშვილი 1976 წელს დაიბადა. 1993 წელს ადიგენის მუნიციპალიტეტის სოფელ ვარხნის საშუალო სკოლა დაამთავრა, რის შემდეგაც სწავლა ივანე ჯავახიშვილის თბილისის სახელმწიფო უნივერსიტეტის მესხეთის ფილიალში, ისტორიის ფაკულტეტზე გააგრძელა. 2001 წელს გაზ-გასამართი სადგური „ბეთენიას“ დირექტორად დაინიშნა. 2009 წელს კი ახალციხის რაიონულ სასამართლოში კურიერად მუშაობდა. 2010 წელს ფირმა „აზერი შაიტში“ მუშაობდა, რომელიც თბილისი-კარწახის გზის მშენებლობის სამუშაოებს ასრულებდა. 2011 წელს კი რკინიგზაზე გააგრძელა მუშაობა.
„ნოემბრიდან რკინიგზის მშენებლობა დაიხურა. მერე გამგეობაში განცხადება მქონდა შეტანილი. აქედან გამომდინარე, სამუშაო გამოცდილება გაითვალისწინეს და სახანძროს უფროსად დამნიშნეს“, - ამბობს კბილაშვილი.
[თამარ თოთაძე, ახალციხე]