საგანგებო: სახანძრო ტექნიკის განაწილებისას სამცხე–ჯავახეთი პრიორიტეტი იქნება

საგანგებო სიტუაციების მართვის სამსახურმა 20 ახალი სახანძრო მანქანა შეიძინა და უახლოეს დღეებში სამცხე–ჯავახეთს ორ, ან სამ სახანძრო მანქანას გადასცემს: „ჩვენ გვაქვს უკვე მიღებული ექვსი მანქანა, უახლოეს ორ კვირაში კიდევ 14 მანქანა უნდა შემოვიდეს და გადავანაწილებთ მათ რეგიონებში. ბუნებრივია, სახანძრო მანქანებს მიიღებს სამცხე–ჯავახეთიც“, – განუცხადეს „სამხრეთის კარიბჭეს“ საგანგებო სიტუაციების მართვის სამსახურში.

უწყების ინფრომაციით, დამატებით კიდევ 20 წყალმზიდის შეძენა იგეგმება. მათ შორის, ასევე სამი ერთეული, სამცხე–ჯავახეთს გადაეცემა. გარდა ამისა, დღეს, 6 სექტემბერს, მთავრობის გადაწყვეტილებით, გამოცხადდება ტენდერი, რომელშიც გამარჯვებული კომპანია 20 მაღალი გამავლობის პიკაპს სამაშველო ჯგუფებისთვის შეიძენს. საგანგებო სიტუაციების მართვის სამსახურში აცხადებენ, რომ ახალი ტექნიკა საბჭოთა დროინდელ მანქანებს ჩაანაცვლებს.

სამცხე–ჯავახეთში სულ 160 მეხანძრე–მაშველია და რეგიონის მასშტაბით 18 სახანძრო მანქანა ირიცხება. როგორც საგანგებო სიტუაციების მართვის სამსახურის სამცხე–ჯავახეთის რეგიონული სამმართველოს უფროსი ილია თავთეთრიშვილი ამბობს, მათ შორის ყველა საბჭოთა პერიოდისაა: ეს მანქანები ძირითადად 1980–იან წლებშია გამოშვებული და მოძველებულია, მაგრამ მაინც ვახერხებთ ხოლმე ხანძართან გამკლავებას“.

თავთეთრიშვილის თქმით, ახალი ტექნიკა რეგიონში 10 დღეში ჩამოვა.

[მარიამ ბარძიმაძე, ახალციხე]