ქეთევან ხმალაძის საქმეს ორივე მხარე ასაჩივრებს

პროკურატურა სააპელაციო სასამართლოში ახალციხის რაიონული სასამართლოს მიერ მიღებულ გადაწტყვეტილებებს იმ ნაწილში გაასაჩივრებს, რომელშიც პირველმა ინსტანციამ გამამართლებელი გადაწყვეტილებები გამოიტანა.

პროკურორი ვასილ ოსიძე მეორე ინსტანციის სასამართლოში დარიკო შავაძეზე დანაშაულის შუტყობინებლობისთვის, თემურ ბერიძეზე კი მკვლელობისთვის გამამტყუნებელი განაჩენების გამოტანას მოითხოვს.

გადაწყვეტილებას ადვოკატებიც ასაჩივრებენ. ყველა ბრლადებულის, მათ შორის ქეთევან ხმალაძის დამცველები მათი დაცვის ქვეშ მყოფების გამართლებას მოითხოვენ.

შეგახსენებთ, ახალციხის რაიონულმა სასამართლომ 13 იანვარს ნინოწმინდაში, ჩარენცის ქუჩაზე მომხდარი ყაჩაღობისა და მკვლელობის საქმეში ბრალდებულად 5 პირი ცნო. ხუთიდან ორს ყაჩაღობაში დახმარებისთვის, დანარჩენებს კი ყაჩაღობისთვის თავისუფლების აღკვეთა მიუსაჯა. მკვლელობის ნაწილში კი გამოაცხადა, რომ დაუდგენელია ეს ფაქტი სამი პირიდან რომლემა ჩაიდინა. შესაბამისად ჯეირანაშვილმა ამ ნაწილში გამამართლებელი განაჩენი გამოიტანა. ასევე გამამართლებელი განაჩენი გამოიტანა დანაშაულის შეუტყობინებლობისთვის ბრალდებულისთვისაც.

[თამუნა უჩიძე, ახალციხე]