ქეთევან ხმალაძის ადვოკატი: 'სასამართლო იძულებით მოპოვებულ მტკიცებულებებს დაეყრდნო'

ახალციხის რაიონული სასამართლოს მიერ გადაწყვეტილების გამოცხადებას ნინოწმინდაში მომხარი ყაჩაღობისა და მკვლელობის საქმეზე, მსჯავრდებულ ქეთევან ხმალაძის ადვოკატები არ დასწრებიან. მოსამართლე გოჩა ჯეირანაშვილმა მას თავისუფლების აღკვეთა ყაჩაღობაში დახმარებისთვის 9 წლით მიუსაჯა.

მისი უფლებადამცველის ირაკლი ბარძიმაძის თქმით, როგორც მისთვის გახდა ცნობილი სასამართლო გადაწყვეტილების მიღებისას იმ მტკიცებულებებს დაეყრდნო, რომლებიც გამოძიებამ ბრალდებულების ცემითა და იძულების წესით მოიპოვა.

„ისე როგორც ხმალაძეს, სხვა ბრალდებულებსაც საგამოძიებო ექსპერიმენტი პოლიციელებმა ცემით ჩაატარებინეს და გადაუღეს სურათები. თან შემთხვევის ადგილზე საგამოძიებო ექსპერიმენტამდე, პოლიციელები უკვე 13–ში ნამყოფები იყვნენ იმ სახლში, ამიტომ სასამართლოს მხრიდან იმის თქმა, რომ თუ ბრალდებულებმა სახლი არ იცოდნენ ხელს როგორ იშვერდნენო, აბსურდია“, – ამბობს ბარძიმაძე და ამატებს, რომ ეს მტკიცებულებები იყო ირიბი და არა პირდაპირი, ამირტომ მათი გაზიარება დაუშვებელი იყო.

ბარძიმაძე ახალციხის რაიონული სასამართლოს გადაწყვეტილების გაუქმებას და ხმალაძის გამართლებას სააპელაციო სასამართლოში ეცდება.
შეკითხვაზე, ვიდრე საქმე მესამე ინსტანციამდეც მივა, რამდენად შესაძლებელია, რომ პროკურატურაში დაწყებული გამოძიება ბრადლებულების შესაძლო ცემის ფაქტზე დასრულდეს და სასამართლოს მტკიცებულებების იძულებით მოპოვებასთან კავშირში მსჯელობის საფუძველი ჰქოდნეს, ბარძიმაძე გვპასუხობს: „ამის მოლოდინი არ მაქვს. როცა მაგალითად მსჯავრდებული გიორგი კაპანაძის საქმე გვაქვს, სადაც დადასტურებული ცემის ფაქტზე ძიება შეწყვიტეს, არ მაქვს იმის იმედი, რომ ამ მსჯავრდებულების ცემის ფაქტს ვინმე გამოიძიებს. ჯერ არც ვიცით რაზე მიდის გამოძიება“.

სამცხე–ჯავახეთის საოლქო პროკურატურა ნინოწმინდაში მომხდარი ყაჩაღობისა და მკვლელობის საქმეშე მსჯავრდებულების შესაძლო ცემი ფაქტს სისხლის სამართოს კოდექსის 333–ე მუხლით იძიებს. როგორც აღნიშნულ უწყებაში აცხადებენ, ძიება ამ დრომდე მიმდინარეობს და უკვე ყველა ბრალდებული დაკითხულიცაა.

შეგახსენებთ, ახალციხის რაიონულმა სასამართლომ 13 იანვარს ნინოწმინდაში, ჩარენცის ქუჩაზე მომხდარი ყაჩაღობისა და მკვლელობის საქმეში ბრალდებულად 5 პირი ცნო. ხუთიდან ორს ყაჩაღობაში დახმარებისთვის, დანარჩენებს კი ყაჩაღობისთვის თავისუფლების აღკვეთა მიუსაჯა. მკვლელობის ნაწილში კი გამოაცხადა, რომ დაუდგენელია ეს ფაქტი სამი პირიდან რომლემა ჩაიდინა. შესაბამისად ჯეირანაშვილმა ამ ნაწილში გამამართლებელი განაჩენი გამოიტანა. ასევე გამამართლებელი განაჩენი გამოიტანა დანაშაულის შეუტყობინებლობისთვის ბრალდებულისთვისაც.

[თამუნა უჩიძე, ახალციხე]