ჯავახეთის დაცულ ტერიტორიაზე ნადირობისთვის სასაზღვრო პოლიციის მაღალჩინოსანი შესაძლოა დაჯარიმდეს

სასაზღვრო პოლიციის დეპარტამენტის დირექტორის მოადგილე კახა ჩინჩალაძე ჯავახეთის დაცულ ტერიტორიაზე თანმხლებ პირებთან ერთად, 18 ოქტომბერს ნადირობდა.

აღნიშნულ ფაქტს გარემოსდაცვითი ზედამხედველობის დეპარტამენტში ადასტურებენ და ამბობენ, რომ მოკლული მხოლოდ ერთი გარეული იხვია.

„ჩინჩალაძე მარტო არ იყო, მას სხვა პირებიც ახლდნენ, შედგა სამართალდარღვევის ოქმი და რეაგირებისთვის სასამართლოს გადაეგზავნა.
ჯარიმის ოდენობას მოსამართლე განსაზღვრავს“, – განუცხადეს „სამხრეთის კარიბჭეს“ გარემოსდაცვითი ზედამხედველობის დეპარტამენტის საზოგადოებასთან ურთიერთობის სასამხურში.

ოქმი, რომელიც ამავე უწყების განცხადებით, სასამართლოს უკვე გადაეცა, ადმინისტრაციული სამართალდარღვევათა კოდექსის N84–ე, N86–ე და N89–მუხლების სხვადასხვა ნაწილებს მოიცავს. რაც ნადირობის წესების, ასევე დაცული ტერიტორიებისა და მათი ტერიტორიულ–ფუნქციოური ზონების დაცვის წესების დარღვევას გულისხმობს.

[თამუნა უჩიძე, ნინოწმინდა]