ენმ ახალციხე: სამცხე–ჯავახეთიდან თბილისში 2 000–მდე მხარდამჭერი გაემგზავრა

„ნაციონალური ოძრაობის“ მხარდამჭერთა კოლონები ახალციხიდან დილით, 11:20 საათზე დაიძრა. პარტიის შემაჯამებელ შეკრებაზე ადგილობრივები, ახალციხიდა დაახლოებით 50–მდე ავტომანქანით წავიდნენ. აქტივისტები დედაქალაქში საქართველოს ეროვნული და ევროკავშირის დროშებით, ასევე 5–ნომრიანი პოსტერებითა და არჩევნებში მონაწილე სუბიექტების პლაკატებით გაემგზავრნენ.

„მე ვარ „ნაციონალური მოძრაობის“ პროგრამის მხარდამჭერი. ადამიანებმა კარგად უნდა იცხოვრონ და ეს კარგად ცხოვრება „ქართულ ოცნებაში“ არ გამოჩნდა. მათ ოთხი წელი იმუშავეს და ადამიანი ადამიანს გადაკიდეს“, – ამბობს ახალციხის მცხოვრები გიორგი კეთილაძე.
არჩევნებში გამარჯვების მოლოდინით წავიდა შეკრებაზე ახალციხის მუნიციპალიტეტის საკრებულოს დეპუტატი „ნაციონალური მოძრაობიდან“ ტარიელ ტაბატაძე.

,,საქართველოს მომავალი კეთილდღეობისათვის მივდივართ. რაც მოგვატყუეს და ჩაძირეს ხალხი, ის უნდა ამოვატივტივოთ. უამრავი ხალხი იქნება დღეს მხარდამჭერები. მოლოდინი გვაქვს, რომ 100 %–ით გავიმარჯვებთ“ – ამბობს დეპუტატი ტარიელ ტაბატაძე.

„ნაციონალური მოძრაობის“ მხადამჭერთა შემაჯამებელ შეკრებაზე მანქანების კოლონები სამცხე–ჯავახეთის შვიდივე მუნიციპალიტეტიდან წავიდა. პარტიის ახალციხის ორგანიზაციის თავმჯდომარე, გელა დემეტრაძე განმარტავს, რომ რეგონიდან 2 000–მდე მხარდამჭერი გაემგზავრა, თუმცა შესაძლებელი იყო უფრო მეტი ადამიანის წასვლა: „უბრალოდ ცოტა შეზღუდული იყო ტრანსპორტი. ორგანიზებაში ოფისიც დაეხმარა და ასევე ჩვენი მეგობრები მოვიდნენ მანქანებით, რომ მსურველები წაეყვანათ“.

„ნაციონალური მოძრაობის“ მხარდამჭერები დღეს შემაჯამებელ შეხვედრას თბილისში, "ვარდების მოედანზე“ 16:00 საათზე გამართავენ. შეკრებილებს სიტყვით „ერთიანი ნაციონალური მოძრაობის“ ლიდერები მიმართავენ. რის შემდეგაც „ვარდების მოედნიდან“ რუსთაველის გამზირისკენ მსვლელობა გაიმართება და იგი პარლამენტის შენობასთან დასრულდება.

[თაკო ფეიქრიშვილი, ახალციხე]