საპროტესტო აქციას ახალციხიდან ‘ნაციონალები’ უერთდებიან

"ნაციონალური მოძრაობის" ახალციხის რაიონული ორგანიზაციის აქტივისტებმა და მხარდამჭერებმა, საპროტესტო აქციისთვის მობილიზება დღეს, 10 ივნისს, დაახლოებით 11:00 საათზე დაიწყეს. ისინი ბორჯომი–ახალციხის საავტომობილო გზაზე, სლესის ციხესთან შეიკრიბნენ.

ამ დროისათვის, ადგილზე სამი მიკროავტობუსია, თუმცა ორგანიზატორები ამბობენ, რომ ადგილობრივებს კიდევ ორი მიკროავტობუსით ელოდებიან.

"ახალციხისთვის ბევრნი მივდივართ. რამდენიმე ავტომანქანა უკვე წავიდა, დანარჩენები ერთად მივდივართ. აქ პარტიის მხარდამჭერები ათი პროცენტი იქნებიან, სხვები ჩვეულებრივი მოქალაქეები არიან, რომლებსაც წამოსვლა უნდოდათ“, – ამბობს ახალციხეში "ნაციონალური მოძრაობის" ლიდერი ირაკლი ბარძიმაძე.

მისივე განმარტებით, მობილიზება "ნაციონალური მოძრაობის" ახალციხის ორგანიზაციამ გააკეთა – "ჩვენ მოვახერხეთ მობილიზება, რაც შევძელით, აქტივისტებთან ერთად".

თბილისში, რუსათველზე საპროტესტო აქცია დღეს, 10 ივნისს, 16:00 საათზე გაიმართება.

შეგახსენებთ, რომ აქცია 4 ივნისს დაანონსდა, მას შემდეგ რაც, ხორავას ქუჩაზე მოკლული დავით სარალიძის მამა, ზაზა სარალიძე პრემიერ–მინისტრ, გიორგი კვირიკაშვილს შეხვდა და განმარტა, რომ ხელისუფლებას ქმედითი ნაბიჯების გადასადგმელად ვადას 10 ივნისამდე აძლევდა. "აქცია გრძელდება იმიტომ, რომ მე ნაბიჯები ჯერჯერობით ვერ დავინახე", – განაცხადა მედიასთან ზაზა სარალიძემ.



[sknews.ge]