არაფრისმთქმელი პასუხები წერილებზე

საავადმყოფოს ახალმა მფლობელმა „ჩემი ოჯახის კლინიკა“, რომელიც „ალდაგი ბი სი აის“ შვილობილი კომპანიაა, 11 მედდა , 2 თერაპიული და 2 პედიატრიული განყოფილების ექიმი სამსახურიდან გასული წლის 30 ნოემბერს გაუშვა. სამსახურიდან გათავისუფლებულმა მედდებმა წლის ბოლოს სამსახურში დაბრუნების მოთხოვნით, შრომის, ჯანმრთელობისა და სოციალური დაცვის სამინისტროს მიმართეს, პოლიკლინიკის საავადმყოფოდან გამოყოფისა და ქალაქში სხვა შენობაში განთავსების შესახებ კი ახალციხის მუნიციპალიტეტის გამგეობას.

”ახალციხის რეფერალური საავადმყოფო წარმოადგენს კერძო სამართლის სუბიექტს. ...ამდენად პრობლემების მოგვარება სცილდება სამინისტროსთვის კანონმდებლობით მინიჭებული კომპეტენციის ფარგლებს”, - ნათქვამია საქართველოს შრომის, ჯანმრთელობისა და სოციალური დაცვის სამინისტროს წერილში (#01/987).

ასევე წერილში ნათქვამია, რომ ჯანდაცვის სამინსიტრო მუშაობს კონცეფციაზე, რომელიც ორიენტირებული იქნება როგორც პაციენტების, ასევე სამედიცინო პერსონალის უფლებების დაცვაზე, მათ შორის კვალიფიციური კადრების მოზიდვასა და მათი დასაქმებისთვის ეფექტური გარანტიების შექმნაზე.

რაც შეეხება მუნიციპალიტეტის გამგეობიდან მიღებულ წერილს, გამგებელი მედდებს პასუხობს, რომ ”ნამდვილად ჩაშლილია რაიონში გადაუდებელი სამედიცინო დახმარების და პირველადი მომსახურების პროგრამა. უმძიმესი მდგომარეობაა სამედიცინო მომსახურების ტარიფებთან დაკავშირებით. ამჟამად მუნიციპალიტეტის გამგეობა შესაძლებლობისდა მიხედვით დაუყოვნებლივ ეხმაურება თქვენი სახელით მოსახლეობის მიერ წამოჭრილ პრობლემებს და რიგგარეშე საკითხთა რიგში უახლოეს მომავალში იქნება მიმართული გამგეობის არსებული შენობა-ნაგებობათა ფონდიდან ამ პრობლემის გადასაწყვეტად”.

წერილში აღნიშნულია, რომ ”გამგეობამ შეაჩერა მნიშვნელოვანი სტრატეგიის მქონე შენობების გასხვისების პროგრამა და ვცდილობთ ისინი უპირველეს შემთხვევაში გამოყენებული იქნეს დარღვეული სისტემის აღსადგენად”.

როგორც მედდამ ნაზი პონიატოვსკმა განგვიმარტა, უახლოეს დღეებში მედდები ადვოკატთან გაივლიან კონსულტაციას და იურისტის რჩევის მიხედვით სასამართლოს ან პროკურატურას მიმართავენ.

[თამუნა უჩიძე, ახალციხე]