წულუკიანი ვალეში საზოგადოებრივ ცენტრს ხსნის, მუშებს კი ჯერ ხელფასები არ აუღიათ

დავით ახალკაცი საზოგადოებრივი ცენტრის მშენებლობაზე რვა დღის განმავლობაში მუშაობდა, როგორც იგი ამბობს „პრარაბმა“ კუთვნილი 250 ლარი არ გადაუხადა.

„ჯერ გვითხრეს 12 სექტემბერს მოგცემთ, მერე 15–შიო, წინა კვირაშიც დაგვპირდნენ, მაგრამ არ გადაგვიხადეს. დღეს მინისტრი მოდის, სამუშაოები დასრულდა, უნდა ვუთხრათ, რომ დღის ბოლომდე გადაგვიხადონ“, – ამბობს დავით ახალკაცი.

მისი თქმით, მსგავს სიტუაციაში კიდევ სამი ადამიანია.

სამუშაოთა მწარმოებელი გიორგი ბოჩიკაშვილი ადასტურებს, რომ მუშებზე გასაცემი ხელფასი ნამდვილად აქვს, თუმცა მათი რაოდენობა დიდი არაა.

„ჩაბარდა ობიექტი. სამუშაოს შესრულების მიხედვით გვიხდიან თანხას. კერძო ხომ არ არის, ამოვიღო ჯიბიდან და მივცე. თვის ბოლოს ვრიცხავთ ხელფასს. დავალიანებას არასოდეს ვიტოვებთ“, – ამბობს გიორგი ბოჩიკაშვილი.

შეგახსენებთ, რომ ვალეში საზოგადოებრივი ცენტრის მშენებლობა ხუთი თვის წინ დაიწყო და ახლა დასრულდა. ახლადაშენებულ ცენტრს დღეს, 26 სექტემბერს იუსტიციის მინისტრი თეა წულუკიანი გახსნის.

ვალის საზოგადოებრივ ცენტრში ადგილობრივებს შესაძლებლობა ექნებათ 200 დასახელების მომსახურებით ისარგებლონ.

[თინათინ ზაზაძე, ახალციხე]