‘ჩვენ აღვადგენთ ურთიერთობას რუსეთთან’ – ‘პატრიოტთა ალიანსმა’ ახალციხეში წინასაარჩევნო კამპანია დაიწყო

„ქართულ ოცნებას“ ხალხისთვის წართმეული ქონება უნდა დაებრუნებინა. მათი არცერთი დაპირება არ შესრულებულა. გარდა ერთისა, ბიძინა ივანიშვილს 80 მილიონი რომ წაართვეს, ბანკის მანქანასთან ერთად, ის დაუბრუნეს“, – ამ სიტყვებით მიმართა თაყაიშვილის ქუჩის მცხოვრებლებს ახალციხის მერობის კანდიდატმა ბესიკ ტაბატაძემ.

მისი თქმით, ქვეყანაში უსამართლობა ისევ არის, „პატრიოტთა ალიანსი“ კი სამართლიანობის აღდგენას პირდება: „გარდა ამისა, ჩვენ აღვადგენთ ურთიერთობას რუსეთთან“.

„პატრიოტთა ალიანსის“ წარმომადგენლებმა განმარტეს, რომ ამ გასვლით მათ ოფიციალურად დაიწყეს წინასაარჩევნო კამპანია. 22 სექტემბრიდან კი ამომრჩევლებთან შეხვედრებს ადიგენში გაგრძელებენ. გარდა ამისა დარიგდება პლაკატები, ფლაერები და პარტიის გაზეთები.

დეპუტატობის კანდიდატი ირწმუნება, რომ გამარჯვების შემთხვევაში მისი პარტია პირველ რიგში უმუშევრობისა და საყოველთაო ჯანდაცვის პრობლემების მოგვარებას დაიწყებს.

„კარგია, რომ ოპერაციას აფინანსებენ, მაგრამ რატომ მიგვყავს ადამიანი ოპერაციამდე, როცა შეიძლება დიაგნოსტიკის ჩატარება და გამოკვლევა?! ეს არ ფინანსდება, მოსახლეობას კი ძალიან უჭირს. უმუშევრებს უნდა დაენიშნოთ 200–ლარიანი დახმარება, თითო არასრულწლოვან შვილზე კი 50 ლარი დაემატოს. უნდა შეძლოს ეს სახელმწიფომ, ან დაასაქმოს. როცა სახელმწიფო ბიუჯეტიდან ამ თანხებს გაიღებს, უკვე იზრუნებს, რომ უმუშევრობაც შემცირდეს“, – ამბობს ნიკოლოზ ინასარიძე.

ადგილობრივები „პატრიოტთა ალიანსის“ მერობისა და მაჟორიტარი დეპუტატობის კანდიდატებს ახალციხეში დაუსრულებელ და უხარისხოდ შესრულებულ ინფრასტრუქტურულ პროექტებზე ესაუბრნენ.

„მარტო სამი საათით მოდის, გვინდა მუდმივი წყალი. ცუდი ხარისხის ასფალტია დაგებული ტროტუარზე, ცოცხი ვერ მოგვისვია ძირს. სანიაღვრე არხები არ არის დახურული და არის საშიშროება ბავშვები ჩავარდნენ. უკეთესის იმედი გვაქვს, იმედია შეასრულებენ დანაპირებს“, – ამბობს თაყაიშვილის ქუჩაზე მცხოვრები კარინა აკოფოვა.

მერობის კანდიდატმა ბესიკ ტაბატაძემ მოსახლეობა სარჩევნებში მონაწილეობისკენ მოუწოდა: „არ მიგატოვებთ გაჭირვებაში, ჩვენთვის არ არის პრიორიტეტი სკამი და სავარძელი. გვენდეთ ჩვენ, მოგვეცით ნდობის მანდატი“.







[თნათინ ზაზაძე, ახალციხე]