ინკლუზიური სწავლების კურსები ახალციხის ახალგაზრდულ ცენტრში

წინუბნელი რუსლან ჩუტკერაშვილი რამდენიმე კვირაა ახალგაზრდულ ცენტრში საბუღალტრო, საგადასახადო და კომპიუტერულ კურსებს უფასოდ გადის. აღნიშნული სფეროები თავად შეარჩია.

„ამ პროექტმა საშუალება მომცა გამოვსულიყავი ოთახიდან და აღარ ჩავკეტილიყავი, მომეცა საშუალება, რომ მესწავლა და საკუთარი თავის რეალიზება მომეხდინა“, -გვეუბნება რუსლან ჩუტკერაშვილი.

რუსლან ჩუტკერაშვილი ინკლუზიურ სწავლებაში ახალციხის ახალგაზრდული ცენტრის სამოქალაქო განათელების პროგრამისა და ასოციაცია მაკლეინის პარტნიორობით ჩაერთო.

როგორც ახალციხის ახალგაზრდულ ცენტრში განმარტავენ, სამოქალაქო განათლების პროგრამაში ჩართულმა მოსწავლეებმა, მონაწილეობა მაკლეინის მიერ გამოცხადებულ საგრანტო კონკურსში მიიღეს. მათ უნდა მოეძიებინათ ინფორმაცია სოფლებში მცხოვრები შშმ პირების შესახებ და ისინი ინკლუზიურ სწავლებაში ჩაერთოთ.

„კონკურსში გურკელის საჯარო სკოლამ გაიმარჯვა. ამ სკოლის მოსწავლეებმა იპვეს რუსლანი“ – განმარტავს პროგრამის კოორდინატორი მზია ინასარიძე.

მისივე თქმით, კურსების დასრულების შემდეგ რუსლან თავად შესძლებს სოფელ წინუბანში სხვებს ასწავლოს კომპიუტერი, საბუღალტრო საქმე და საგადასახადო კოდექსი.

[ლუბა გიორგაძე, ახალციხე]