შელაპარაკება ზარზმაში – მუსლიმები სამუფთო სამმართველოს მიმართავენ

მუსლიმმა თემმა იმამის შეურაცხყოფის ფაქტთან დაკავშირებით სამუფთო სამმართველოს მიმართვა გუშინ, 9 სექტემბერს, საღამოს გაუგზავნა.
მათ ზარზმაში მეჩეთის წინამძღვარს ოთარ გორგაძესა და მონასტრის წინამძღვარს ნიკოლოზ გეწაძეს შორის მომხდარი შელაპარაკება დაწვრილებით აღწერეს და სამმართველოს რეაგირება სთხოვეს.

„რა ფორმით მოახდენს რეაგირებას სამმართველო, ამას თავად მუფთი გადაწყვეტს“, – ამბობს სამცხე–ჯავახეთის მუფთი მამუკა ვაშაყმაძე.
იგი, გუშინ მომხდარი ინციდენტის შემდეგ ზარზმის მეჩეთში იმისთვის, რომ ვითარებაში გარკვეულიყო, ჭელას მეჩეთის წინამძღვართან ჯამბულ აბულაძესთან ერთად მივიდა.

„დაწვრილებით მოვისმინეთ იმამის ნაამბობი, მუსლიმი თემი უკიდურესად ნაწყენი და გაბრაზებულია. არცერთი მღვდლის მუშაობაში ჩვენ არ ვერევთ და ნურც თვითონ ჩაერევიან. იმამი დამოუკიდებელია და დამოუკიდებლად გააგრძელებს მუშაობას“, – აცხადებს ვაშაყმაძე.
მისი თქმით, ასეთი ფაქტის განმეორების შემთხვევაში სასამართლოს მიმართავენ, თუმცა, ამ ეტაპზე მხოლოდ სამუფთო სამმართველოსთან წერილის გაგზავნით შემოიფარგლენენ: „მუფთს მივწერეთ, მაგრამ ჯერ პასუხი არ მიგვიღია“.

აბულაძის განცხადებით, მუსლიმი თემი არ აპირებს, რომ ამ ფაქტთან დაკავშირებით ადგილობრივ ხელისუფლებას მიმართონ.

„ყველამ კარგად იცის, რომ სწორედ ადგილობრივი ხელმძღვანელობისაგან ხდება წახალისება და ხელშეწყობა. უფრო მეტიც, დაწინაურება ყველა იმ პიროვნების, ვისაც თუნდაც მცირე წვლილი მიუძღვის მუსლიმების შეურაცხყოფაში. მგონი დროა დასრულდეს ასეთი თვითნებური და სახელმწიფოს იმიჯის შემლახველი ქმედებები“, – წერს აბულაძე ფეისბუქის საკუთარ გვერდზე.

შეგახსენებთ, რომ ზარზმის მეჩეთის წინამძღვარი ოთარ გორგაძე ზარზმის მონასტრის წინამძღვარს ნიკოლოზ გეწაძეს სიტყვიერ შეურაცხყოფაში ადანაშაულებს. შემთხვევა გუშინ, 9 სექტემბერს ზარზმის მონასტრის წინ მოხდა. გორგაძე მეჩეთში სალოცავად მიდიოდა, თუმცა როგორც თავად აცხადებს, იგი გზაზე არ გაატარეს და შეურაცხმყოფელი სიტყვებით სოფლისა და მეჩეთის დატოვება მოსთოხოვეს.

[თამუნა უჩიძე, ახალციხე]