გოჩა ჯეირანაშვილს პარლამენტში რვა ნოემბერს მოუსმენენ

საქართველოს პარლამენტის იურიდიულმა კომიტეტმა, უზენაესი სასამართლოს მოსამართლეობის კანდიდატების მოსმენა 23 სექტემბრიდან დაიწყო. კომიტეტი გოჩა ჯეირანაშვილს ყველაზე ბოლოს მოუსმენს.

გოჩა ჯეირანაშვილი იმ 20 ადამიანს შორის მოხვდა, რომლებიც იუსტიციის უმაღლესმა საბჭომ უზენაესი სასამართლოსთვის შეარჩია და ოთხ სექტემბერს დაამტკიცა, პარლამენტს კი შვიდ სექტემბერს გადაუგზავნა. კომიტეტმა ამ დროისათვის უკვე ათამდე კანდიდატს მოუსმინა.

იურიდიული კომიტეტის წინაშე უზენაესი სასამართლოს მოსამართლეობის კანდიდატებმა, თავიანთი წარსული საქმიანობის და ყველაზე გახმაურებული საქმეების შესახებ ისაუბრებს.

იურიდიული კომიტეტის წევრების კითხვებზე პასუხის გაცემა მოუწევს გოჩა ჯეირანაშვილსაც, რომელიც ახალციხის რაიონულ სასამართლოში 11 წლის განმავლობაში მუშაობდა, მათ შორის თავმჯდომარის პოზიციაზე.

ჯეირანაშვილის საქმიანობაში ერთ–ერთი გახმაურებული 2013 წლის საქმე იყო, რა დროსაც უდანაშაულოდ ცნო პოლიციის მაღალჩინოსნები, რომლებიც გაუპატიურება/წამებაში იყვნენ ბრალდებულები. დაზარალებულების განცხადებით, მოსამართლე გოჩა ჯეირანაშვილის ხელში რაიმე სამართლის მიღწევა შეუძლებელი იყო. მათივე ინფორმაციით, ის ვანო მერაბიშვილის ერთგული კადრი იყო სამცხე-ჯავახეთში.

იუსტიციის უმაღლესი საბჭოს მიერ შერჩეული 20 მოსამართლიდან, უმრავლესობას მრავალწლიანი სამოსამართლეო გამოცდილება აქვს, ორი პროკურორია, ერთი კი იუსტიციის უმაღლესი საბჭოს დამოუკიდებელი ინსპექტორი.

იუსტიციის უმაღლესმა საბჭომ საქართველოს პარლამენტისათვის წარსადგენად კანდიდატთა შერჩევის პროცესი 2019 წლის 10 მაისიდან დაიწყო.

[ლუბა გიორგაძე, ახალციხე]