როგორ ჩაერთოს მეტი მოქალაქე თვითმმართველობის მუშაობაში

ახალციხის დემოკრატიული ჩართულობის ცენტრში ადგილობრივი ხელისუფლების, სამოქალაქო საზოგადოებისა და მედიის წარმომადგენლებისთვის თვითმმართველობაში მოქალაქეთა ჩართვის ინოვაციური სისტემის შესახებ პრეზენტაცია გაიმართა.

„ოზურგეთის ახალგაზრდა მეცნიერთა კლუბის“ გამგეობის თავმჯდომარემ მინდია სალუქვაძემ ოზურგეთის მუნიციპალიტეტში დანერგილი ახალი ინიციატივა საზოგადოებას გააცნო. მისი საშუალებით, მოქალაქეებს საშუალება ეძლევათ მოკლე ტექსტური შეტყობინებებითა და ელ. ფოსტით მიიღონ ინფორმაცია საკრებულოს სხდომების განრიგის, დღის წესრიგის, სხდომებზე დასწრების პროცედურებისა და მიღებული გადაწყვეტილებების შესახებ.

„ჩვენ შევიმუშავეთ, სპეციალური ელექტრონული პროგრამა, რომელიც პროგრამაში სურვილისამებრ რეგისტრირებულ მოქალაქეებს შესაბამის შეტყობინებებს ავტომატურად უგზავნის“, - ამბობს სალუქვაძე.

ახალციხის საკრებულოს თავმჯდომარის მოადგილე თამარ გოგოლაძე ამბობ, რომ კარგი იქნება, თუ მსგავსი სისტემა ახალციხის თვითმმართველობაშიც დაინერგება: „რაც პრეზენტაციაზე მოვისმინე, ეს მართლაც მოქნილი სისტემაა და მოსახლეობასთან ურთიერთობასაც აადვილებს. კარგი იქნება თუ ამას ჩვენც განვახორციელებთ“.

სპეციალური ელექტრონული პროგრამა „ოზურგეთის ახალგაზრდა მეცნიერთა კლუბმა“, ACCESS–ის ფინანსური მხარდაჭერითა და ადგილობრივ თვითმმართველობასთან თანამშრომლობი შეიმუშავა.

[ლუბა გიორგაძე, ახალციხე]