‘ყაჩაღობისას სკოჩი დარჩათ და საქმე იმიტომ ჩაეშალათ’ – მოწმე ხმალაძის საქმეზე

დღეს, 31 აგვისტოს, ახალციხის რაიონულ სასამართლოში ზესტაფონის პოლიციის თანამშრომელი ალექსი კალმაძე დაიკითხა. იგი ნინოწმინდაში მომხდარი ყაჩაღობისა და მკვლელობის საქმეში ექვსიდან ერთ–ერთი ბრალდებულის, ივანე გ–ს ნათესავია.

ივანე გ–ც ზესტაფონის მუნიციპალიტეტში ცხოვრობს. მან ნინოწმინდაში მომხდარიდან მეორე დღეს, თავს გადახდენილი თავის პოლიციელ ნათესავს გაანდო და დახმარება სთხოვა. შსს–მ აღნიშნული ყაჩაღობისა და მკვლელობის საქმე, სწორედ აქედან გახსნა.

„ამ წლის 15 იანვარი იყო, მობილურზე უცხო ზარი შემოვიდა, ივანე იყო და ნახვას მთხოვდა, იმ დღეს ოპერატიული მორიგე ვიყავი და მეორე დღეს ვნახე. მითხრა, რომ ტრაგედია მოხდა და არ იცოდა რა ექნა“, – ყვება კალმაძე.

მისი თქმით, ივანეს ძველმა ნაცნობებმა შესთავაზეს, რომ ახალციხეში წასულიყო, რადგან იქ იყო კაცი, რომელიც ოჯახში დიდი რაოდენობით თანხას ინახავდა: „იმასთან დასაყაჩაღებლად მივიდნენ, მერე იქ ქალი შემოაკვდათ, დაიშალნენ და ვეღარ გაიგეს რა ექნათ. ვურჩიე ეს ყველაფერი ეთქვა, რადგან მაინც ნახავდნენ და უვადოს მისცემდნენ“.

პროკურორის შეკითხვაზე, ვის შემოაკვდა ქალი, კალმაძემ უპასუხა: „თემურ ბ–ს. ივანეს მანქანაში რომ დასხდნენ, ეს მერე, იქ თქვეს, დანაც გადაადგდეს მანქანიდან, ტანსაცმელიც გამოიცვალეს. მანქანაში არჩევდნენ ვინ რა გააკეთა, ვისი ბრალი იყო მომხდარი და რატომ ჩაიშალა საქმე“.

„რატომ ჩაიშალა საქმე?“ – შეუბრუნა კითხვა მოწმეს პროკურორმა.

„სკოჩი დარჩა რომელიღაცას, არ შეიტანა როცა შევიდა, რომ ხალხისთვის დაეკრათ. ერთი გავიდა სკოჩის მოსატანად, დაიბნენ, სამივე ხომ არ მოკლავდა იმ ქალს, ერთმა უნდა მოკლას და ორი გარედან დაეხმაროს“, – განაცხადა დარბაზში კალმაძემ.

მისი დაკითხვის შემდეგ სხდომაზე ნივთიერი მტკიცებულებები გამოიკვლიეს.

შეგახსენებთ, მიმდინარე წლის 13 იანვარს ნინოწმინდაში მომდარი ყაჩაღობისა და მკვლელობის საქმეზე 6 პირი 2016 წლის 16 იანვარს დააკავეს. მათ შორის ხუთს ჯგუფურ ყაჩაღობაში, ერთს ყაჩაღობასთან ერთად მკვლელობაში, ერთს კი დანაშაულის შეუტყობინებლობაში ადანაშაულებენ.

[თამუნა უჩიძე, ახალციხე]