ავარიის შედეგად დაშავებული ორი ახალგაზრდის მდგომარეობა მძიმეა

ორ ახალგაზრდას, რომლებიც გუშინ ღამითვე, კატასტროფის ბრიგადებმა თბილისში გადაიყვანეს, რამდენიმესაათიანი ოპერაცია ჩაუტარდათ. თუმცა ახლობლების განცხადებით, მათი მდგომარეობა ისევ მძიმეა. ერთ–ერთი ახალგაზრდა, რომლის ოპერაცია რამდენიმე საათს გრძელდებოდა, ამ დრომდე გონზე არ მოსულა.

„მდგომარეობას ართულებს ის ფაქტი, რომ ის ავარიის შემდეგ გონზე არ მოსულა, აქვს თავის ტრამვაც. დილის ათი საათისვის ექიმებმა გვითხრეს, რომ მდგომარეობა სტაბილურად მძიმეაო“, – ამბობენ ახლობლები.

რაც შეეხება, მეორე ახალგაზრდას, რომელიც თბილისში „ახალციხის რეფერალური ჰოსპიტალიდან“ გადაიყვანეს, ისევ ნარკოზის ქვეშ, მართვით სუნთქვაზე რჩება.

დაშავებული მესამე ახალგაზრდა კი „ახალციხის რეფერალურ ჰოსპიტალში“ აგრძელებს მკურნალობას. სამედიცინო დაწესებულებაში აცხადებენ, რომ მისი მდგომარეობა სტაბილურია და სტაციონალურ მკურნალობას გადის. ახალგაზრდას ქირურგიული ჩარევა არ დასჭირვებია.

შეგახსენებთ, რომ ავტოსაგზაოშემთხვევა ახალციხე–ასპინძის დამაკავშირებელ გზაზე, სოფელ რუსთავთან გუშინ, 7 მაისს, დაახლოებით 17:00 საათისთვის მოხდა. „ტოიოტას“ მარკის მსუბუქი ავტომობილი გზაზე მოცურდა გადავარდა.

შემთხვევაზე ძიება 276–ე მუხლის პირველი ნაწილით მიმდინარეობს, რაც ტრანსპორტის მოძრაობის ან ექსპლუატაციის წესის დარღვევას გულისხმობს.

[ლუბა გიორგაძე, ახალციხე]