ძირითადი და დამხმარე საოლქო კომისიები – ვის რა როლი ექნება არჩევნებში

თუ აქამდე სამცხე–ჯავახეთს პარლამენტში 6 დეპუტატი ჰყავდა, ახლა მოქალაქეები 3 დეპუტატს აირჩევენ. საარჩევნო ოლქები გამსხვილდა და თუ მაგალითად, წინა მოწვევის პარლამენტში ადიგენსა და ახალციხეს ცალ–ცალკე დეპუტატი ჰყავდა, ახლა ამ მუნიციპალიტეტებს ქვეყნის საკანონმდებლო ორგანოში ერთი პირი წარადგენს. ასევე, ერთ დეპუტატს აირჩევენ ახალქალაქსა და ნინოწმინდაში და ბორჯომსა და ასპინძაში.

მიუხედავად მაჟორიტარული საარჩევნო ოლქების გამსხვილებისა, საარჩევნო ადმინისტრაციები, ადგილობროვ დონეზე, უცვლელად რჩება. ადიგენისა და ახალციხის შედეგები უნდა დაჯამდეს, თუმცა, საოლქო კომისია იქნება ადიგენშიც და ახალციხეშიც. ასევე იქნება სამცხე–ჯავახეთის სხვა მუნიციპალიტეტებშიც.

ცვლილების შემდეგ, ახალციხე-ადიგენის მაჟორიტარული საარჩევნო ოლქი 44–ე ნომერია. ამ საარჩევნო ოლქში, №37ახალციხის საოლქო საარჩევნო კომისია ძირითადი, ხოლო №38 ადიგენის საოლქო საარჩევნო კომისია დამხმარე იქნება.

ბორჯომი-ასპინძის საარჩევნო ოლქის გაერთიანების შემდეგ, მას ნომერი 45 მიენიჭა. აქ ძირითადი ბორჯომის N36 საოლქო საარჩევნო კომისია, ხოლო დამხმარე N39 ასპინძის საოლქო კომისია იქნება.

იგივენაირად ჩამოყალიბდა ახალქალაქი-ნინოწმინდის №46 საარჩევნო ოლქიც. აქ №40 ახალქალაქის საოლქო საარჩევნო კომისია ძირითადი, №41 ნინოწმინდის საოლქო საარჩევნო კომისია კი დამხმარე იქნება.

როგორც ცენტრალური საარჩევნო კომისიის ვებგვერდზე ვკითხულობთ, საქართველოში 53 ძირითადი საოლქო საარჩევნო კომისია და 20 დამხმარე საოლქო საარჩევნო კომისიაა.

ცესკოს ინფორმაციით,

 საოლქო საარჩევნო კომისიების ნუმერაცია არ შეცვლილა

 საოლქო საარჩევნო კომისიების ნუმერაცია და მაჟორიტარული საარჩევნო ოლქების ნუმერაცია სხვადასხვაა ნებისმიერი დამთხვევის მიუხედავად

 საოლქო საარჩევნო კომისია თავის უფლებამოსილებას ახორციელებს შექმნილი მაჟორიტარული საარჩევნო ოლქის შესაბამის ტერიტორიაზე

ძირითადი და დამხმარე საოლქო საარჩევნო კომისიების ფუნქციები განსხვავდება, თუმცა არა რადიკალურად. განსხვავება ისაა, რომ გადამწყვეტი ძირითადი საოლქო კომისიაა.

მაგალითად, დამხმარე კომისიას იღებს საინიციატივო ჯგუფის კანდიდატის საბუთებს, თუმცა, მას ვერ არეგისტრირებს. დასარეგისტრირებლად მიღებული დოკუმენტაცია ძირითად საოლქო კომისიაში უნდა გადაგზავნოს.

ასევე, ძირითადი საოლქო კომისია ქმნის საარჩევნო უბნებს, ადგენს საარჩევნო უბნების ნომრებს და აზუსტებს საზღვრებს, დამხმარე კი ძირითადი საოლქო საარჩევნო კომისიის წერილობითი მოთხოვნის საფუძველზე მონაწილეობს საარჩევნო უბნების საზღვრების დაზუსტებაში და ასე შემდეგ.

რაც შეეხება არჩენების დღეს და საბოლოო ოქმებს, კენჭისყრის დღეს საბოლოო სიტყვა ძირითად საოლქო კომისიას ეკუთვნის.



დეტალურად მთავარი და დამხმარე საოლქო საარჩევნო კომისიები ფუნქციები, შეგიძლიათ იხილოთ მითითებულ ბმულზე

[ლუბა გიორგაძე, ახალციხე]